Videosunu yaydı, zəng gəldi ki, həmin yeri vurublar: o qəmi hiss edin! – VİDEO
Dəfələrlə deyilsə də, izah edilsə də, “düşmənə sirr verməyin!” çağırışı bir çoxları tərəfindən anlaşılmır. Başa düşmürlər ki, nə qədər ciddi təhlükəyə səbəb ola bilərlər və təcrübə göstərir ki, belə videolar faciəvi hadisələrlə də nəticələnib.
Düşmənə sirr vermə, yəni məğrur ordumuzun planlarını puç etmə, harada olduqlarını qarşı tərəfə bildirmə, həmin ərazini atəş hədəfinə çevirmə, anaları göz yaşına qərq etmə, igidlərimizin ölümünə səbəb olma!
Layk, reytinq xatirinə insanların həyatı ilə oynama! – Düşmənə sirr vermə! Çəkmə! Yayma! Paylaşma! Heç vatsap və digər mesajlaşma platformaları ilə dostlarına göndərmə!
Nə qədər çətindir ki, bunu anlamaq? Reytiqmi, laykmı, yoxsa insanların həyatımı daha da önəmlidir?!
Tanınmış blogerlərimiz aktual, izləməli və buradan ibrət götürməli videoçarx hazırlayıblar. Ekran işində də görüntüləri paylaşmağa ciddi yanaşılmamağın sonda faciə ilə nəticələndiyi yer alıb. Videoda ana göz yaşları içində zəng vuraraq o qəmi tamaşçıya hiss etdirməyə çalışır, bəlkə bununla insanlar nə etdiyinin fərqinə varar. Video köhnə olsa da, yenə də düşüncəsiz insanlar üçün aktuallığını qoruyur.
Yenə də inanmırsınızsa, videodan sonrakı fotoya baxın. Baxın və bilin ki, erməni teleqram kanalları, düşmən yerli sosial mediamızı diqqətlə izləyir və ermənilərin teleqram adminləri belə, koordinatları müəyyən edib paylaşırlar.
Kiminsə ölümündə əli olan necə rahat ola bilər, necə vicdanı onu rahat buraxar ömrünün sonuna qədər?! Hələ-hələ bu hadisədə qurban Vətən üçün döyüşə qalxan igidlərimizdən biridirsə…
Əlbəttə ki, şəhid olmaq ən böyük ZİRVƏDİR! Amma döyüşüb düşmənə zərbə endirmək, düşməni sarsıtmaq, qarşıya qoyulmuş hədəf uğrunda canından keçmək tamamilə ayrı mövzudur.
Paylaşan dostumuzu gördükdə qarşı çıxmaq, lazım gələrsə, lap üstünə çəmkirmək də lazımdır. Bu iş haqq işdir, bu iş zərurətdir, bu iş vacibdir, bu iş stratejidir, bu iş elə Vətəninin müdafiəsinə qalxmaqdır, səngərdəki döyüş yoldaşını düşmən gülləsindən qorumaqdır!
Samir Mirzə (Miri)
Ölkə.Az
