Ermənilərin Qarabağla bağlı tələbi rədd edildi - Nə etmək istəyirlər?

Avropa İnsan Haqları Məhkəməsi (AİHM) İrəvan-Gümrü avtomobil yolunda qəza nəticəsində həlak olan Qarabağın erməni əsilli sakini Helen Dadayanın cəsədinin daşınması məsələsi ilə bağlı ərizəni rədd edib.

Ölkə.Az erməni mətbuatına istinadən xəbər verir ki, Helen Dadayanın qohumları daha əvvəl AİHM-ə müraciət etmişdilər ki, məhkəmə Azərbaycanı cəsədin dəfn olunmaq üçün Qarabağa aparılmasına icazə verməyə məcbur etsin.

Helenin əmisi Muşeq Səfəryan bildirib ki, məhkəmə fövqəladə tədbirin tətbiqinə ehtiyac olmadığını hesab edib, ona görə də cənazənin daşınması məsələsi fövqəladə qaydada müzakirə olunmayacaq.

“Bu qərar bizim üçün gözlənilməz oldu. Biz Ellenin cəsədini təcili tibbi yardım maşını ilə nəzarət-buraxılış məntəqəsinə apardıq, lakin Azərbaycan tərəfi bildirdi ki, biz yalnız BQXK vasitəsilə daşınma təşkil edə bilərik.

Nəticədə yenidən sənədlərlə bağlı suallar yarandı.

Azərbaycan tərəfi BQXK-nın daşıma sənədlərində Artsax Respublikasının deyil, Azərbaycan Respublikasının göstərilməsini tələb edir, lakin Ermənistan tərəfi bu cür ifadəyə qarşı çıxır. Artıq BQXK-yə heç bir ümid yoxdur, onların təşkilatı vasitəsilə daşıma artıq mümkün deyil”, – Muşeq Səfəryan bildirib.

Ölkə.Az