"Məktəblərimizdə pedoqoqlar tərəfindən bu uşaqlara qarşı bullinq var"

Ölkə.Az xəbər verir ki, bu sözləri marketoloq Pərviz Əzimov qeyd edib. O, özəl və dövlət məktəblərinin heç birində ASP-li uşaqların inteqrasiyası üçün üçün proqram olmamasını deyərək kəskin iradını bildirib: 

"Ümumiyyətlə, məktəbəqədər hazırlıq və ibtidai sinif pedoqoqlarının ASP haqqında məlumatı yoxdur. Hər 36 uşaqdan biri o deməkdir ki, ortalama hər 3 sinifdən birinə bir ASP-li uşaq düşür. Və bu rəqəm sürətlə artır. 

Bizim təhsil sistemimizdə isə bununla bağlı bircə proqram belə yoxdur. Nəinki inteqrasiya proqramı yoxdur, əksinə, pedoqoqlar tərəfindən bu uşaqlara qarşı bullinq var". 

Fotoda Pərviz Əzimov

Marketoloq hesab edir ki, hər fürsət düşəndə 150-200 min müəllimə göndərilən SMS-in pulu ilə ildə bir neçə məktəbin müəllimini peşəkarlaşdırmaq olardı: 

"Hər il yüzlərlə ASP-li uşaq təhsildən mərhum olur. Bunun axırı necə olacaq, kim inteqrasiya edəcək bunları cəmiyyətə?! Bir ASP-li uşağın adi bağça xərci aylıq 1500-2000 AZN arasıdır. Azərbaycanda neçə faiz ailənin aylıq bu məbləği ödəmək imkanı var?! 

Peşəkar həkim-psixiatr, klinik psixoloqlara müraciət edirsən, deyirlər, uşaq məktəbə tam hazırdır, ora getməlidir ki, daha da inkişaf etsin. Gedirsən məktəbə, biabırçılıq. Uşağı inkişaf etmək əvəzinə, daha da geri salırlar və ya bir çox hallarda uşağı qəbul belə etmirlər". 

P.Əzimov bildirib ki, elm və təhsil naziri Emin Əmrullayevin sosial şəbəkə hesabından mesaj formasında ünvanladığı müraciətə və qurumun rəsmi saytında qəbul üçün onlayn müraciətinə cavab ala bilməyib.

Mövzu ilə bağlı Elm və Təhsil Nazirliyindən Ölkə.Az-ın sorğusuna cavab olaraq bildirilib ki, sağlamlıq imkanları məhdud şəxslərin təhsili (xüsusi təhsil) haqqında Azərbaycan Respublikasının Qanunu  21.1-ci bəndinə əsasən, uşaqların xüsusi təhsilə cəlb olunması barədə qərarın qəbul edilməsi yerli təhsili idarəetmə orqanlarının nəzdində fəaliyyət göstərən psixoloji-tibbi-pedaqoji komissiyasının səlahiyyətindədir:

"Qeyd olunanları nəzərə alaraq şagirdin xüsusi təhsil ehtiyaclarının qiymətləndirilməsi məqsədi ilə yaşayış yeri üzrə yerli təhsili idarəetmə orqanına müraciət edilməlidir. Bu halda uşaq komissiyanın qərarına əsasən, ehtiyacına uyğun olaraq xüsusi təhsilin təşkili formasına (inklüziv sinif, xüsusi sinif və ya evdə təhsil) yönləndiriləcəkdir. Eyni zamanda sağlamlıq imkanları məhdud uşaqların xüsusi təhsil ehtiyacları əsasında onun təhsil alacağı proqram psixoloji-tibbi-pedaqoji komissiyanın qərarı ilə müəyyənləşir.

 Nəzərinizə çatdıraq ki, xüsusi şərait yaradılmadan ümumi təhsilə cəlb edilmiş şagirdlərin statistik məlumatı ETN-də yoxdur, çünki bu qəbildən olan təhsilalanlar psixoloji-tibbi-pedaqoji komissiyanın iştirakı ilə xüsusi təhsil ehtiyacları müəyyənləşdirilməmiş şagirdlərdir" - açıqlamada bildirilib.

Billurə Yunus