Jurnalist Masazır avtobusundan şikayət etdi: Abır-həya qalmayıb, qanqaraçılıqdır

Ölkə.Az xəbər verir ki, bu barədə jurnalist Elgün Mənsimov Azərbaycan Yerüstü Nəqliyyat Agentliyinə (AYNA) müraciət ünvanlayıb. O, avtobusların intervalının çox olmasından kəskin narazılığını bildirib:

“Avtobusların sayı artırıldı, interval guya 5 dəqiqəyə düşəcəkdi, amma 10-15 dəqiqəyə ancaq gəlirlər. Gələndə də sürücülər, saxlamır, saxlasalar da, minməyə yer yoxdur. İnsanlar rəsmən presslənir. Camaat yazıqdır. Belə olmaz! 

Zəngilan şəhərciyinə hər iki avtobusdan birinin 2-3 nəfərlə  getməyi mütləqdirmi? Olmazmı pik saatlarda 3-4 avtobusdan birini ora göndərəsiniz?! Şəhər istiqamətindən gələn o 2-3 nəfər düşüb digər avtobusu gözləyə bilər. Amma minlərlə insana yazıq deyilmi?

Vətəndaşlar arasında, vətəndaşlar və sürücülər arasında  abır-həya da qalmayıb. Hər gün dava, hər gün söz-söhbət, hər gün qanqaraçılıq! Sərnişinlərin də, sürücülərin də psixologiyası pozulub artıq!”

Qeyd edək ki, sözügedən şikayətlə əlaqədar Ölkə.Az AYNA-ya sorğu ünvanlayıb.

Billurə