Sülhün magistralı: Bakıdan Avrasiyaya uzanan yol - Şərh
Bunu Ölkə.az-a açıqlamasında Milli Məclisin deputatı Vüqar Rəhimzadə deyib.
Onun sözlərinə görə, Azərbaycanın təşəbbüsü ilə Ermənistanın tədricən regional blokadadan çıxarılması sülh gündəliyinin yalnız diplomatik bəyanatlardan ibarət olmadığını, real addımlarla dəstəkləndiyini göstərir. “Azərbaycanın öz ərazisi üzərindən Qazaxıstan və Rusiyadan Ermənistana taxıl daşınmasına imkan yaratması, eləcə də 2025-ci ilin dekabr ayının sonunda Ermənistana yanacaq tədarükü Bakının konstruktiv və uzaqgörən siyasətinin bariz nümunəsidir”, - o qeyd edib.
Deputat əlavə edib ki, bu addımlar uzun illər iqtisadi izolyasiya şəraitində yaşayan Ermənistan cəmiyyətində birbaşa sosial-iqtisadi effekt yaradıb: “Təsadüfi deyil ki, Ermənistanın baş naziri Nikol Paşinyan bu prosesi açıq şəkildə müsbət hadisə kimi qiymətləndirib və Azərbaycanın benzin və dizel ixracını ölkə daxilində uzun illər mövcud olmuş inhisarçılığın sarsıdılması ilə əlaqələndirib.
Paşinyanın açıqlamalarına görə, dekabrın 25-dən bu günə qədər Ermənistan vətəndaşlarının cibində on milyardlarla dram vəsait qalıb. Bu, enerji bazarında qiymətlərin enməsi və rəqabət mühitinin yaranmasının nəticəsidir. Baş nazirin “benzin və dizel bazarlarında uzun illər mövcud olan inhisarların kağız evlər kimi çökməsi” barədə fikirləri göstərir ki, Azərbaycanla iqtisadi əməkdaşlıq təkcə regional deyil, Ermənistanın daxili siyasi-iqtisadi arxitekturasına da təsir edir.
Əslində bu proses İrəvan üçün mühüm bir həqiqəti üzə çıxarır: Azərbaycanla qarşıdurma Ermənistan cəmiyyətinə itkilər, əməkdaşlıq isə birbaşa iqtisadi və sosial qazanc gətirir.
Sülh gündəliyinin strateji sütunlarından biri Zəngəzur dəhlizinin açılmasıdır. Bu layihə yalnız nəqliyyat marşrutu deyil, Avrasiya məkanında yeni iqtisadi və logistika konfiqurasiyasının formalaşması deməkdir. Paşinyanın da etiraf etdiyi kimi, dəhlizin açılması regiona böyük investisiyaların və ciddi maliyyə axınının gəlməsinə şərait yaradacaq.
ABŞ, Avropa İttifaqı və digər beynəlxalq aktorların bu prosesdə iştirak etməyə maraq göstərməsi Cənubi Qafqazın qlobal iqtisadi və siyasi xəritədə əhəmiyyətinin artdığını göstərir. Ermənistan–Türkiyə münasibətlərinin normallaşması perspektivi isə bu mühitin daha da möhkəmlənəcəyindən xəbər verir.
Bu gün Ermənistan-Azərbaycan münasibətlərində sabitlik, təhlükəsizlik və əməkdaşlıq mühitinin formalaşması təkcə iki ölkə üçün deyil, bütövlükdə Cənubi Qafqaz üçün mühüm nailiyyətdir.
Prezident İlham Əliyevin qətiyyətli və uzaqgörən siyasəti nəticəsində Cənubi Qafqazda formalaşmaqda olan dayanıqlı sülh və əməkdaşlıq modeli regional çərçivəni aşaraq Avrasiya miqyasında yeni qarşılıqlı əlaqə formatlarının yaranmasına zəmin yaradır. Azərbaycan artıq təkcə enerji və nəqliyyat qovşağı deyil, eyni zamanda sülh quruculuğu və regional transformasiya təşəbbüsləri ilə seçilən orta güc statusunu möhkəmləndirir.
Nəticə etibarilə, bu prosesdən bütün tərəflər qazanır: region sabitlik əldə edir, iqtisadi imkanlar genişlənir, beynəlxalq aktorlar üçün etibarlı əməkdaşlıq məkanı formalaşır. Azərbaycan isə Avrasiyada strateji mövqeyini daha da gücləndirərək qarşısına qoyduğu hədəflərə doğru inamla irəliləyir”.
Mürtəza
