Prezident İlham Əliyev Serbiyaya rəsmi səfərə gedib - YENİLƏNİB
Serbiya Sarayında Azərbaycan Respublikasının Prezidenti İlham Əliyevin rəsmi qarşılanma mərasimi olub.
"Ölkə.az" xəbər verir ki, dövlət başçısının şərəfinə Sarayın qarşısında fəxri qarovul dəstəsi düzülüb.
Dövlət başçıları fəxri qarovul dəstəsinin qarşısından keçiblər.
Prezident İlham Əliyev fəxri qarovul dəstəsini salamlayıb.
Fəxri qarovul dəstəsinin rəisi Azərbaycan Prezidentinə raport verib.
Daha sonra hər iki ölkənin dövlət himni səsləndirilib.
***
Azərbaycan Respublikasının Prezidenti İlham Əliyev fevralın 15-də Serbiya Respublikasına rəsmi səfərə gedib.
"Ölkə.az" xəbər verir ki, Belqrad şəhərinin Nikola Tesla Hava Limanında dövlət başçısının şərəfinə fəxri qarovul dəstəsi düzülüb.
Prezident İlham Əliyevi və birinci xanım Mehriban Əliyevanı Serbiya Respublikasının Prezidenti Aleksandar Vuçiç qarşılayıb.
