Bankda pulu olanların nəzərinə - FONDDAN MÜHÜM AÇIQLAMA
Ölkə.az-ın Şamaxıya ezam olunan əməkdaşı xəbər verir ki, bunu Əmanətlərin Sığortalanması Fondunun Hüquq Departamentinin direktoru Azər Əmirov Milli Mətbuat Günü ilə bağlı təşkil olunan Dialoq və Əməkdaşlıq Forumunda bildirib.
Azər Əmirov qorunan əmanətlər üzrə faiz dərəcəsinin yuxarı həddinə də münasibət bildirib. O qeyd edib ki, dünya praktikasında müxtəlif modellər mövcuddur və bir sıra qabaqcıl sistemlərdə belə faiz həddi tətbiq edilmir.
“Lakin bizim bank sistemi və əmanətlərin sığortalanması sistemi nisbətən yenidir. Faiz həddinin müəyyən edilməsi hüquqi baxımdan əmanətçilər üçün daha aydın yanaşma yaradır. Onlar bilirlər ki, vəsaiti müəyyən olunmuş faiz həddində yerləşdirdikdə həmin vəsait qorunan əmanət hesab ediləcək və risk baş verdiyi halda kompensasiya olunacaq”, – deyə fond rəsmisi bildirib.
Hazırda milli valyutada qorunan əmanətlər üzrə illik faiz həddi 12%, xarici valyutada isə 2,5% təşkil edir.
"Fondun Sığorta və risklərin idarə olunması departamenti banklardan daxil olan məlumatlar, eləcə də qorunan əmanətlər üzrə hesabatlar əsasında bu göstəriciləri mütəmadi təhlil edir. Aparılan qiymətləndirmələr göstərir ki, bazarda yerləşdirilən əmanətlər əsasən mövcud faiz hədlərinə uyğun olduğundan onların dəyişdirilməsinə ehtiyac yoxdur".
Fond rəsmisi bildirib ki, əvvəlki dövrlərdə milli valyutada qorunan əmanətlər üzrə yuxarı faiz həddinin müəyyənləşdirilməsində daha çox intuitiv yanaşmadan istifadə olunurdu. Hazırda isə Mərkəzi Bankın iştirakı ilə hazırlanmış xüsusi metodologiya əsasında bazardakı tendensiyalar və müvafiq göstəricilərin xüsusi çəkisi hesablanır.
"Məsələ altı aydan bir Fondun Himayəçilik Şurasında müzakirə olunur və faiz dərəcəsinin artırılması və ya azaldılması imkanları qiymətləndirilir. Bu yanaşmanın tətbiqinə 2026-cı ilin əvvəlindən başlanılıb. İndiyədək aparılan hesablamalar qorunan əmanətlər üzrə faiz hədlərinin artırılmasına və ya azaldılmasına ehtiyac olmadığını göstərir. Yaxın müddətdə məsələyə yenidən baxılacaq. İlkin məlumatlara əsasən, hər hansı dəyişiklik gözlənilmir. Lakin yekun qərarın qəbul edilməsi Əmanətlərin Sığortalanması Fondunun Himayəçilik Şurasının səlahiyyətindədir”, – deyə o əlavə edib.
