Pezeşkian: ABŞ-nin dəniz blokadası iflasa məhkumdur

Ölkə.Az xəbər verir ki, bu barədə o öz Teleqram kanalında yazıb.

"Bu gün düşmənlərimiz yanaşmanı dəyişərək, iqtisadi və dəniz sahələrinə təzyiq göstərməklə "dəniz blokadası" və dəniz ticarətinin məhdudlaşdırılması strategiyasından İran hökumətinə və xalqına qarşı yeni təzyiq aləti kimi istifadə edirlər. Lakin düşmənlər bilməlidirlər ki, Fars körfəzi birtərəfli iradənin diqtə edildiyi arena deyil, beynəlxalq qarşılıqlı fəaliyyət sisteminin bir hissəsidir. Onun təhlükəsizliyi yalnız birgə əməkdaşlıq və sahilyanı ölkələrin suverenliyinə hörmət sayəsində mümkündür. Hər hansı blokada və ya məhdudiyyət cəhdləri beynəlxalq hüquqa ziddir, region xalqlarının maraqlarına, qlobal sülh və sabitliyə təhdiddir və iflasa məhkumdur.

Dəfələrlə bəyan etdiyimiz kimi, xarici dövlətlərin iştirakı və müdaxiləsi regionun təhlükəsizliyinin artmasına xidmət etmir, əksinə, gərginlik yaradır və Fars körfəzindəki davamlı sülhü pozur. Müharibə zamanı Amerika hərbi bazalarının mövcudluğu onlara ev sahibliyi edən ölkələrin təhlükəsizliyini təmin etmədi, əksinə, onların sabitliyini təhdid etdi. Bu da bizə həmin bazaları təhlükə mənbəyi hesab etməyə və onlara qanuni zərbələr endirməyə imkan verdi.

İran İslam Respublikası Fars körfəzi və Hörmüz boğazının təhlükəsizliyinin hamisi kimi — təcavüzkar ölkələr istisna olmaqla — gəmiçilik azadlığı və dənizlərin təhlükəsizliyi prinsiplərinə sadiq qalmağa davam edir. Lakin hesab edirik ki, bu prinsiplərə riayət edilməsi İran xalqına və suverenliyinə hörmətlə müşayiət olunmalıdır. Bu su hövzəsindəki istənilən qeyri-sabitliyə görə məsuliyyət ABŞ və sionist rejimin üzərinə düşür", — deyə Pezeşkian qeyd edib.