“Klon”un ulduzu 4 dəfə lazımsız əməliyyat olunub

“Klon” serialında "Beta" obrazı ilə tanınan braziliyalı aktrisa Françieli Freduzeski həkimlərin uzun illər ona düzgün diaqnoz qoya bilmədiyini açıqlayıb.

"Ölkə.az" xəbər verir ki, aktrisanın sözlərinə görə, xəstəliyin ilk əlamətləri 2018-ci ildə ortaya çıxıb. O, 27 həkimə müraciət etsə və çoxsaylı müayinələrdən keçsə də, mütəxəssislər problemin səbəbini müəyyən edə bilməyiblər.

Freduzeski bildirib ki, bu müddətdə ona ehtiyac olmadığı halda dörd əməliyyat edilib. Aktrisa iki dəfə onurğasından, həmçinin çiyin və omba nahiyələrindən əməliyyat olunduğunu deyib.

Nəhayət, ona fibromialgiya diaqnozu qoyulub. Bu xəstəlik bədənin müxtəlif hissələrində, xüsusilə əzələ və vətərlərdə ağrılar, xroniki yorğunluq, yuxu pozuntuları, narahatlıq, yaddaş problemləri və depressiya ilə müşayiət olunur.

Aktrisa hekayəsini fibromialgiya və digər görünməz xəstəliklər barədə məlumatlılığı artırmaq məqsədilə paylaşdığını vurğulayıb. Bu xəstəliklər insanın zahiri görünüşündə özünü göstərməsə də, gündəlik həyatını ciddi şəkildə çətinləşdirir.(axşam.az)