Moqerini: Avropa İttifaqı “Dağlıq Qarabağı” tanımır
Avropa İttifaqı Azərbaycanın ərazi bütövlüyü və suverenliyini dəstəkləyir.
Ölkə.Az-ın Report-a istinadən verdiyi xəbərə görə, bu barədə Avropa İttifaqının xarici işlər və təhlükəsizlik siyasəti üzrə ali nümayəndəsi Federika Mogerini Azərbaycan XİN rəhbəri Elmar Məmmədyarovla keçirdiyi birgə mətbuat konfransında bildirib.
Onun sözlərinə görə, Avropa İttifaqı Dağlıq Qarabağı tanımır.
“Münaqişənin status-kvosu qeyri-sabitdir”, - deyə F.Mogerini qeyd edib. O, tərəfləri münaqişəni danışıqlar və sülh yolu ilə həll etməyə çağırıb və bildirib ki, Dağlıq Qarabağ məsələsi Aİ üçün prioritet olaraq qalır.
Aİ-in ATƏT-in Minsk qrupunun münaqişənin nizamlanması istiqamətində göstərdiyi səyləri dəstəklədiyini deyən F.Mogerini tərəflər arasında qarşılıqlı inamın yaranmasının vacibliyini qeyd edib.
Federika Mogerini həmçinin bildirib ki, Azərbaycanın Avropa İttifaqının güclü ticarət müttəfiqi olmaq üçün potensialı var.
O, Azərbaycan və Aİ-nin güclü ticarət əlaqələrinə malik olduğunu, Aİ-nin Azərbaycan üçün ən iri investor olduğunu vurğulayıb.
Aİ-nin ali nümayəndəsi həmçinin Azərbaycanın Ümümdünya Ticarət Təşkilatına üzv olmasıyla bağlı danışıqların səmərəli olacağına ümidvar olduğunu bildirib.
