Sinabunq püskürdü

Mayın 21-də İndoneziyanın qərbində yerləşən Şimali Sumatra əyalətindəki Sinabunq vulkanının püskürməsi nəticəsində həlak olanların sayı altı nəfərə çatıb. Bu barədə mayın 22-də Təbii Fəalkətlərlə Mübarizə İdarəsinin nümayəndəsi Sutopo Purvo Nuqroho məlumat verib.

Ölkə.Az Azərtac-a istinadən xəbər verir ki, vulkan püskürərəkən kül və isti qaz kütləsini bir neçə yüz netr hündürlüyə atıb. Ölənlər və zərərçəkənlər hadisə zamanı həmin yerdən dörd kilometr aralıdakı düyü tarlalarında çalışan insanlar olub. Yerli hakimiyyət orqanlarının bildirdiyinə görə, vulkan “qırmızı zona” adlanan əraziyə aiddir və təhlükəsizlik məqsədilə burada hərəkət qadağan edilib.

S.P.Nuqroho bildirib ki, vulkan yağışı nəticəsində doqquz nəfər zərər çəkib. Onlardan altısı həlak olub, ağır yanıqlar alan digər üçü isə ağır vəziyyətdədir.

Ümumi hündürlüyü 2,46 kilometr təşkil edən Sinabunq Şimali Sumatra əylətinin mərkəzi olan Medan şəhərinin yaxınlığında yerləşir. İndoneziyanın 130 fəal vulkanı siyahısına daxil olan Sinabunq üç illik fasilədən sonra 2013-cü il sentyabrın 15-də oyanıb. Həmin vaxt 25 mindən çox insan evlərini tərk etməyə məcbur olmuşdu. Sinabunqun 2014-cü ilin əvvəllərində növbəti püskürməsi isə 16 nəfərin ölümü ilə nəticələnib.