Ancelina Coli London İqtisadiyyat Məktəbində dərs deyəcək

Hollivud ulduzu, BMT-nin xoş məramlı səfiri və qadın haqları müdafiəçisi Ancelina Coli nüfuzlu London İqtisadiyyat Məktəbində müharibənin qadınlara təsirinə dair dərs deyəcəyini bildirib.

Məlumata görə, aktrisanın adı məktəbin dəvət olunmuş pedaqoqları siyahısına da daxil edilib.

Bu barədə Ölkə.Az "BBC"yə istinadən məlumat verir.

"Mən bu proqramın yaradılmasından çox məmnunam. Qadın haqlarının müdafiəsinə dair diskussiyanı mütləq genişləndirmək, münaqişələr zamanı məhz qadınlara qarşı yönəlmiş qanunsuzluq və seksual cinayətlərə son qoymaq lazımdır", deyə A.Coli öz təyinatı ilə bağlı sualı cavablandırarkən deyib.

Britaniyanın keçmiş xarici işlər naziri Vilyam Xeyq və Ancelia Coli artıq uzun illərdir birgə təsis etdikləri "Qadın haqları, Sülh və Təhlükəsizlik Mərkəzi" çərçivəsində əməkdaşlıq edirlər.

2012-ci ildən aktrisa və siyasətçi dünyadakı münaqişə zonalarında qadınlara qarşı seksual xarakterli zorakılıqların qarşısının alınması üzrə kampaniyalar həyata keçirirlər. Qeyd edək ki, V. Xeyq də London İqtisadiyyat Məktəbində dəvət olunmuş professor statusu ilə dərs deyəcək.

2011-ci ildə Ancelina Coli Bosniyada baş vermiş münaqişədən və bu münaqişədən əziyyət çəkən qadınların həyatından bəhs edən "Qan və bal diyarında" adlı film çəkib.

Humanitar təşkilatların qiymətləndirməsinə görə, Bosniyadakı münaqişə zamanı əsgərlər 20 mindən çox qadına təcavüz ediblər.

İlhamə
Ölkə.Az