Lavrov: "Sanksiyalar Rusiyaya mane ola bilməz"

Rusiyanın xarici işlər naziri Sergey Lavrov növbəti dəfə bəyan edib ki, Rusiya məhdudiyyətlərin ləğv edilməsi üçün meyarları müzakirə etməyib və müzakirə etmək niyyətində deyil.

Bu barədə Ölkə.Az "RİA Novosti" agentliyinə istinadən məlumat verir.

"Bu sualı sanksiyalar labirintinin yaradıcılarına yönəltmək lazımdır".- deyə o bildirib.

Nazir söyləyib ki, Moskva Avropa İttifaqı ilə münasibətlərdə mənfi halların aradan qaldırılması üçün imkanların mövcudluğuna inanır. Onun sözlərinə görə, tərəfləri coğrafi, iqtisadi, tarixi və sadəcə insani baxımdan bir çox amillər birləşdirir".

Avropa İttifaqının sanksiyalarla bağlı məhdudlaşdırıcı tədbirləri iyulun 31-nə kimi qüvvədədir. 28-29 iyunda keçiriləcək sammitdə sanksiyaların uzadılması məsələsinə baxılacaq.

Xatırladaq ki, bir sıra Avropa ölkələri və bəzi avropalı siyasətçilər məhdudiyyətlərin aradan qaldırılmasını istəyirlər. Almaniyanın nüfuzlu "Demokratik Xristian İttifaqı" və "Xristian Sosial İttifaqı" partiyaları artıq müvafiq xahişlə Angela Merkelə müraciət ediblər.

Mayın 18-də İtaliyanın Veneto Şəhər Şurasının deputatları sanksiyaların ləğv edilməsinin vacibliyini vurğulayan qətnamə qəbul ediblər.

İlhamə
Ölkə.Az