İŞİD-in növbəti hədəfi Antalyadır

Ölkə.Az "Cumhuriyet" qəzetinə istinadən xəbər verir ki, İŞİD-in Türkiyədə həyata keçirəcəyi növbəti terror aktlarının siyahısı ələ keçirilib. İŞİD turizm zonaları əsas hədəf olaraq seçilib.

Bu məqsədlə terrorçular 150 kamikadze hazırlayıb. Onlar əcnəbilərin toplaşdığı gecə klublarında və əyləncə məkanlarında partlayış törətməyi nəzərdə tuturlar. Həmçinin Antalyada yerləşən Rotary International təşkilatının ofisinin partladılması planı barədə məlumat əldə edilib.

Onlar dini zəmində toqquşmalara səbəb olmaq üçün Ələvilərin toplaşdığı cəm evlərində, o cümlədən, kürdlərin sıx məskunlaşdığı kəndlərdə təxribatlar nəzərdə tutublar. Xüsusi xidmət oranlarının əməkdaşları bu informasiyanı may ayında polislə əməliyyat zamanı özünü partlatmış İŞİD üzvü Yusuf Durmazın kompüterindən əldə ediblər. Terrorçunun siyahısında bir neçə gün öncə Qaziantep şəhərində baş vermiş faciəyə dair də informasiya olub. Belə ki, siyahıda Qaziantepdəki şadlıq evində partlayış törətmək planı da yer almışdı.

Qeyd edək ki, Yusuf Durmaz Türkiyədə qırmızı xətlə axtarışa verilmiş 3 ən təhlükəli terrorçudan biri idi. Onun saxlanması üçün Türkiyə hökuməti 4 milyon lirə mükafat təyin etmişdi. Yusuf Durmazın təşkil etdiyi terror aktları nəticəsində 140 türk vətəndaşı həlak olub.

İlhamə
Ölkə.Az