"3 badam 1 qoz" : "Filmdə 18+ epizodlar..."
Yeni ildə təqdim olunacaq filmlərdən biri də "3 badam 1 qoz" filmidir.
Ölkə.Az xəbər verir ki, gənc aktyorlar güclərini birləşdirərək yeni film ərsəyə gətiriblər. Sosial şəbəkələrdə minlərlə izləyiciləri olan gənc aktyorlar "3 badam 1 qoz" filmi haqqında saytımıza danışıblar. Filmin baş qəhrəmanlarından biri olan Altun Mətləboğlu bildirib ki, bu onların ilk işidir: "Bu ilk böyük işimizdir. Rəsulla ağlımıza belə bir şey gəldi və Sabirlə Mənsur ilə də bunu bölüşdük. Hamımızın ağlına batdı. Ssenarini özümüz yazdıq. Hazırladıq. Dəfələrlə təkrarladıq. Çünki işin məsuliyyətini bilirik. Film sektoru çox çətindir. Biz də inamlı addım atmaq üçün çox çalışdıq. Uğurlu olacağına inanırıq filmin. Filmin çəkiliş prosesi də çox maraqlı və uğurlu alınıb. Bütün komanda olaraq fikrləşirik ki, tamaşaçılar da bəyənəcək. Biz onlara gülüş, sağlam yumor bəxş etmək üçün çalışırıq. İnanırıq ki, onlar da zəhmətimizi dəyərləndirəcəklər. 18+ epizodlardan bacardığımız qədər uzaq qaçmışıq. Rahatlıqla gəlib filmi izləyə bilərsiniz".
Rəsul Abbasov da həmçinin həmkarının fikrlərinə dəstək verərək qeyd edib ki, film istəyi izləyicilərinin xahişi ilə olub: "İzləyicilərimiz bizi filmdə görmək istədilər. Film ortaya qoymağımız istənildi və biz də bunu etdik. Onlara yeni ilin ilk ayının ortalarında təhvil verəcəyik. Qərarı isə onlar verəcək. İnanırıq ki, hər bir şey ürəyimizcə olacaq. Filmin quruluşçu rejissoru Rafael Bağıroğludur. Quruluşçu operator isə Dr. Nicay Zeynallıdır. Film işinin ağırlığını bildiyimiz üçün bu işə canımızı qoymuşuq. İnşallah uğur əldə etdikdən sonra tamaşaçıları çox yeniliklər gözləyir. Bizimlə yanaşı digər yeni film çəkən komandalara da uğurlar arzu edirəm".
Mənsur Şərifovun sözlərinə görə isə bu film bir çox mənəm-mənəm deyən filmlərdən üstündür: "Biz kimisə özümüzə rəqib görmürük. Hərənin öz yolu var. Bizi rəqib görsünlər. Çox uğurlu iş ortaya çıxarmışıq. Özümə və komandamıza inanıram. 40 saniyədə güldürmək daha çətindir, nəinki 80-90 dəqiqədə. 40 saniyəyə biz bunu sığışdırıb gülüş bəxş edə biliriksə, özünüz düşünün 80 dəqiqəyə nələrə qadir olarıq. Hər kəsi filmimizə baxmağa dəvət edirik. Peşman olmayacaqsınız. Komediya janrında olan bir filmdir".
Digərlərinə nisbətən daha gənc olan 20 yaşlı Sabir Samiroğlu da baş rollardan birinin ifaçısıdır: "Çox həyəcanlıyam. İnşallah uğurlu olacaq. Çox səbrsizlənirəm. Rolumun öhdəsindən necə gəldiyimi deyə bilmərəm düzü. Çünki buna tamaşaçı qərar versə, daha doğru olar. İnanıram ki, filmə baxan bütün tamaşaçıların üzünə gülüş bəxş edə biləcəyik".
"3 badam 1 qoz" filminin informasiya dəstəyi Ölkə.Az saytına məxsusdur.
Niyam Şirinov
