Qaz və sudan kasad, zibildən bol Hökməli qəsəbəsindən

Hökməli sakinlərinin "Qaz yox, su yox, yollar bərbad, hər tərəf zibil qaynayır, inanmırsınız gəlin özünüz görün"- dedikdən sonra yollandıq qəsəbəyə.

Hökməliyə gedən Bakı-Şamaxı şosse yolu ən azı Hökməli qəsəbəsinə qədər rahat və təmizdir. Yolun kənarı hər gün təmizlənir, sulanır. Ancaq maşın qəsəbəyə dönəndə o təmizliyi narahat və qırağı zibillik olan yollar əvəz edir. Sadəcə xatırladım ki, Hökməli yolunun üzərində bir neçə məmurun villası var və orada yaşayırlar. Sırf bu səbəbdən yolların hər gün yuyulub təmizləndiyi deyilir.

"Ölkə.Az" Hökməli qəsəbəsinin problemlərindən hazırladığı reportajı sizə təqdim edir:

Qəsəbənin içərisinə doğru irəlilədikcə maşın adamı elə atıb-tutur ki, ürəyində "kaş o məmurların evi Hökməlinin ən hündür yerində olaydı"-deyirsən. Qəsəbənin yolları bərbaddır. Qəsəbə ilə yuxarı qalxdıqca yolların sovetdən qalma beton plitələr düzülmüş olduğunu gördük. Ancaq bu yolları ən lüks maşınla belə gedib gələndə "at arabasındakı" kimi avtomobil adamı atıb-tutur.

Maraqlıdır ki, qəsəbənin yuxarı hissəsində N saylı hərbi hissə yerləşir. Hərbi hissəyə gedən yol da qəsəbədən keçir. Qəsəbə sakinlərinə yazıqları gəlməyənlər, heç olmasa hərbi hissəyə aparan yolu təmir etməlidirlər.

Hökməli qəsəbəsindən keçən magistral yolun təmirinə 2 il öncə Prezidentin Yardım Fondundan vəsait ayrılıb. Ancaq görünən odur ki, Prezidentin Yardım Fondundan ayrılan vəsait kimlərinsə cibinə yol çəkib.

Qəsəbənin hündürdə olan hissəsinin əsas problemlərindən biri də sudur, daha doğrusu susuzluq.

2016-cı ildən HİS (hidroinşaat servis) şirkəti Hökməli qəsəbəsində su və kanalizasiya şəbəkəsinin qurulması işlərinə başlayıb. Ancaq bir ilə yaxındır ki, işlər dayandırılıb və yarımçıq qalıb. Hazırda Xırdalan şəhərinin su və kanalizasiya təchizatı ilə əlaqədar HİS inşaat işləri aparır. Mütəxəssislərin rəyinə görə, Hökməli və Sulutəpə qəsəbələrinin yuxarı hissələrindən gələn yağış və çirkab suları kollektorda toplanmasa, Xırdalanda görülən inşaat işlərində əlavə xərclər yaranacaq. Yəni, Hökməli və Sulutəpə qəsəbələrindən gələn yağış və çirkab suları Xırdalandakı inşaatı yararsız hala salacaq. Ona görə də, öncə Sulutəpə və Hökməlidə inşaat işləri aparmaq daha doğru olardı.

Qəsəbə sakinləri ilə söhbət zamanı məlum olur ki, onlar suyu pulla, susatan maşınlardan alırlar. Orta hesabla hər ay bir ev suya 100 manata yaxın xərc çəkir.

Beton pilitəli yolla yuxarı gedərkən gördük ki, yolun sağındakı evlərdən birinin qapısının ağzında susatan maşın dayanıb. Ev sahibi Həsən kişiyə ayda neçə dəfə su aldığını soruşduqda, deyir, "hər ay 3 çən su vurdururam, hər dəfə də 30-40 manat pulum çıxır".

Susuz qalan qəsəbənin daha bir problemi də qazsızlıqdır.

Hökməli qəsəbəsinə təzə qaz xətləri çəkilib. Sayğac quraşdırılıb. Ancaq qazla işləyən heç bir cihaz çalışmır. Qazın təzyiqi 0.01 bordan aşağıdır. Xətdəki təzyiq ölçüsünün standartdan xəbəri yoxdur. Olmayan təzyiqə isə əlavə tənzimləyici də qoyulub. Hökməli qəsəbəsinin sakinlərinin şikayətlərinə isə heç kim baxmır.

Qəsəbə sakini Ədalət Verdiyevin evində olduq. İşıldayan qazla kibriti müqayəsə etsək, kibrit dənəsi qazdan daha qeyrətli görünər.

Qaz olmadığına görə, qəsəbə sakinləri elektrikdən daha çox istifadə edirlər, bu isə xətlərin yüklənməsi və transfarmatorların sıradan çıxması ilə nəticələnir. Qəsəbəni gəzərkən yeni transfarmatorların quraşdırıldığını gördük. Ümumiyyətlə, qəsəbə sakinləri elektrikdən şikayətçi olmadılar.

Zibil qutusu? - Yolun kənarına nə gəlib ki?

Qəsəbədə gəzərkən zibil qutularına rast gəlmədik. Qəsəbənin zibilliyi yolların kənarıdır. Qəsəbə sakinləri zibillərini elə yolların kənarına tökürlər. Qarşıdan isti yayın gəldiyini nəzərə alsaq, qəsəbənin yollarının mikrob yuvası rolunu oynayacağını anlayarıq.

Yolun kənarına zibil atıb gedən bir nəfərlə qısa söhbətləşirik. Zibil qutusunun harada olduğunu soruşduq, adının Vaqif olduğunu deyən yaşlı kişi deyir, "Nə? Zibil qutusu? Yolun kənarına nə gəlib ki?".

Bunda sonra heç bir şərhə ehtiyac yoxdur.

Maraqlıdır ki, qəsəbədə nə bir istirahət mərkəzinə, nə də bir parka rast gəldik. Hökməli uşaqlarının oyun yeri zibilli yolların kənarıdır. Uşaqlar futbol oynayır, top hərdən zibilliyin içərisinə düşür, gedib o topu götürüb gətirib, yenidən futbola davam edirlər. Sabah infeksiya yayıldı, uşaqlar xəstələndi deyəndə, ilk günahkar zibilliklər olmalıdır. Bəli, zibilliklər, yazıq məmur neyləsin?!

Hökməli qəsəbəsində yaşayış üçün hər bir şərait yaradılarsa, sıx olan Bakıdansa, insanlar məhz qəsəbədə yaşamağa üstünlük verərlər. Bir şey ki, qəsəbə ilə şəhərin arası cəmi-cümlətani 15 dəqiqəlik yoldur. Bu həm də, şəhərdəki sıxlığı da nisbətən azaldar.