"Hər kəs özünü hamıdan ağıllı bilir" - Vaqif Qarayev

"Psixi və ruhi pozuntulardan əziyyət çəkən insanların sayı həm dünyada, həm də ölkəmizdə artır".

Ölkə.az xəbər verir ki, bu sözləri həkim-pediatr Vaqif Qarayev deyib.

Onun sözlərinə görə, qlobal miqyasda müşahidə olunan səbəblər bizə də təsir edir.

"Lakin hər məsələdə olduğu kimi, bu problemin də cəmiyyətimizə xas səbəbləri var. Bu gün kimlə danışsan, özünü "depressiyada" hesab edir. Bahalı telefon almaq, yüksək səviyyəli həyat tərzi sürmək, bahalı avtomobil, mənzil, dəbdəbəli toy və nişan mərasimləri təşkil etmək istəyi bir çox insanı daimi stress və narahatlıq içində saxlayır. Bu hal uzun müddət davam etdikdə daha ciddi problemlərlə nəticələnir. Çox mənasız bir "göstərişli" həyat tərzi seçmişik özümüzə...

Vaxtında həkimə müraciət etmirik, çünki heç kim özünü xəstə hesab etmir. Əksinə, hər kəs özünü hamıdan ağıllı bilir.

"Dəli" sözünün əleyhinəyəm. Ruhi pozğunluq da xəstəlikdir, hətta daha ciddi xəstəlikdir. Çünki insan özünə, düşüncələrinə və davranışlarına nəzarət edə bilmir... Vaxtında müalicəyə başlanılsa, yaşanacaq həyat o qədər də məşəqqətli olmaz".

Həmidə İbrahimova