Dünyanın sonu qorxusundan necə qurtulmaq olar?

Klinik psixoloq Daniel Dennis insanların dünyanın sonu qorxusundan necə xilas ola biləcəyini izah edib.

Ölkə.az xəbər verir ki, bu barədə o, "Yahoo" nəşrinə müsahibəsində danışıb.

Mütəxəssisin sözlərinə görə, bu qorxunu aradan qaldırmaq üçün ilk növbədə xəbərləri hansı mənbələrdən və nə qədər tez-tez oxuduğunu şüurlu şəkildə seçmək lazımdır. O, həmçinin daim xəbərləri yoxlamaq vərdişindən imtina etməyi və diqqəti insanın özünün dəyişdirə biləcəyi sahələrə yönəltməyi tövsiyə edib.

Dennis bildirib ki, insan diqqətini öz təsir dairəsində olan və dəyərlərinə uyğun vacib hesab etdiyi sahələrə yönəltməlidir — bu ailə, cəmiyyət və ya iş ola bilər.

O deyib: “Diqqətinizi təsir edə bildiyiniz və sizin üçün dəyərli olan sahələrə yönəldin. Bu, ailəniz, cəmiyyətiniz və ya işiniz ola bilər.”

Psixoloq həmçinin insanlara belə suallar verməyi məsləhət görüb: “Mən necə bir həyat qurmaq istəyirəm?” və “Bu gün hansı mənalı addımları ata bilərəm?”

Dennis xatırladıb ki, tarix boyu insanlara dəfələrlə dünyanın sonunun gələcəyi barədə proqnozlar verilib, lakin bu baş verməyib.

O əlavə edib ki, əgər dünyanın sonu ilə bağlı düşüncələr insanın gündəlik həyatına mane olur, həyatdan zövq almasına təsir edir və ya münasibətlərini pozursa, mütləq mütəxəssisə müraciət etmək lazımdır.

Həmidə İbrahimova