Deputat: "Ərdoğanla Bayden görüşü iki ölkə arasındakı gərginliyi aradan qaldıracaq"

“NATO-da iki müttəfiq ölkə olan Türkiyə Prezidenti Rəcəb Tayyib Ərdoğanla  ABŞ Prezidenti Co Bayden arasındakı görüş çox ciddi əhəmiyyət daşıyan görüşdür. Bu görüş iki ölkə arasında son illərdə yaranan gərginliyin aradan qalxmasına öz töhfəsini verəcək”.

Bunu “Ölkə.Az”a açıqlamasında millət vəkili Asim Mollazadə deyib.

Onun sözlərinə görə, iki ölkə arasında gərginlyiin yaranmasının səbəblərindən biri terrorizmlə mübarizədə terrorçu təşkilatlara münasibətlər bağlıdır. “Belə ki, ABŞ-ın Suriyada  bəzi terrorçu təşkilatlara  dəstək verməsi Ankaranı ciddi narahat edir və bu səbəbdən də Türkiyə tərəfi Vaşinqtonun bu hərəkətini qəbul etmir. Fikir ayrılığının digər səbəbləri də var və təbii ki, Ərdoğan-Bayden görüşündə bütün bu məsələlər müzakirə olunacaq.

Hesab edirəm ki, görüşün yekunu olaraq iki ölkə arasındakı gərginlik aradan qalxaraq, münasibətlər normallaşmaya doğru gedəcək”- deputat Mollazadə qeyd edib.

 Asim Mollazadə əlavə edib ki, Türkiyə eyni zamanda ABŞ-ın NATO-da özündən sonra ikinci ən böyük silahlı qüvvəyə malik üzv ölkəsi, həmçinin geosiyasi, geostrateji baxımdan mühüm əhəmiyyət kəsb edən ölkədir: “Məhz Türkiyənin iştirak etdiyi mühüm strateji layihələr Qərbin enerji təhlükəsizliyinin təmin olunmasında  müstəsna rola malikdir. Bundan əlavə olaraq dünyada terrorizmə qarşı mübarizədə, qlobal təhlükəsizliyin təmin olunmasında Türkiyənin oynadığı önəmli rolu nəzərə alaraq, görüşdən sonra  iki ölkə arasında münasibətlərdə yaranan narazılıqların aradan qalxmasına və normallaşmasına doğru gedəcəyinə əminəm”.

Ərdoğanın Bakı və Şuşaya səfərinə gəldikdə isə millət vəkili deyib ki, Ərdoğanın Qarabağa səfəri mühüm əhəmiyyət kəsb edir: “Bu iki qardaş ölkənin əməkdaşlığının dərinləşməsi bölgədə vəziyyətin dəyişməsinə gətirib çıxaracaq. Çünki Türkiyə ilə Azərbaycanın enerji, iqtisadi, nəqliyyat və kommunikasiya sahəsində həyata keçirdiyi birgə layihələr  bütövlükdə bölgədə əmin-amanlığın  və əməkdaşlığın daha da dərinləşməsinə xidmət edib. Bundan sonra da bölgədə sabitliyin və təhlükəsizliyin təmin olunmasına öz töhfəsini verəcək. O baxımdan da  dünya Türkiyə  ilə Azərbaycan arasındakı əməkdaşlığın bölgədəki əhəmiyyətini gözəl anlayır və buna böyük əhəmiyyət verirlər. Çünki iki ölkə arasındakı əməkdaşlıq regional əməkdaşlığa töhfə verir”

Mürtəza
Ölkə.Az