Azərbaycana qarşı informasiya savaşı nəyə xidmət edir?

Müasir dünyada münaqişələrdə əsas oyunçuların başlıca mübarizə üsulu informasiya müharibəsidir. İnformasiya müharibəsi cəbhə xətti tanımır. Necə deyərlər, informasiya müharibəsi heç bir sərhəd tanımır, onun üçün keçilməz sədd yoxdur. Müasir silahlı münaqişələrin təcrübəsi göstərir ki, bəzən gücündən də asılı olmayaraq, bütöv bir dövlət inkişaf etmiş informasiya texnologiyalarının qarşısında aciz qalaraq çökür. Çünki informasiya istənilən planın reallaşdırılması üşün zəmin yaradan vasitədir.

Tarixdən də məlumdur ki, informasiya müharibəsi düşmən mövqedə olan dövlətlərin hər zaman bir-birlərinə qarşı atdığı kəskin, təhlükəli addımlarından biri olub və bu gün də aktuallığını qoruyub saxlamaqdadır. Ona görə də bir ölkəyə qarşı informasiya müharibəsi açılırsa, deməli, bunun arxasında hansısa məqsədlər dayanır.

Tehranda HƏMAS lideri İsmayıl Haniyənin öldürülməsindən sonra Yaxın Şərqdə hər an genişmiqyaslı müharibə təhlükəsi gözlənilir. Bölgədə genişmiqyaslı müharibənin başlamasında maraqlı olan güclərlə yanaşı, buna qarşı çıxan güclər və ölkələr də mövcud. Bölgədə müharibəni istəməyən güclər gərginliyin azaldılması istiqamətində səy göstərsələr də, bəzi güclər, əksinə, hər vasitə ilə aidiyyəti olmayan ölkələri bu gərginliyə qatıb, prosesi dalana dirəyib çıxılmaz vəziyyətə salmaq istəyirlər.

Yaxın Şərqdə böhranın dərinləşməsində maraqlı olmayan ölkələrın başında duran ölkə varsa, ilk olaraq bu ölkələr Azərbaycan və Türkiyədir. Çünki həm rəsmi Bakı, həm də Ankara yaxşı anlayır ki, bölgədə böhranın dərinləşməsindən heç kim qazanmayacaq. Əksinə, münaqişə coğrafiyasının genişlənməsi və ya böhranın dərinləşməsi nəinki münaqişəyə cəlb olunmuş ölkələr və bölgə ölkələri, eyni zamanda bölgəyə qonşu ölkələr bundan hər hansı formada fəsadını yaşamalı olacaq.

Ona görə də Ankara və Bakı məsələnin ilk günündən bütün səyini bölgədə eskalasiyanın səngiməsi və qarşısının alınmasına yönəldib.

Təəssüflər olsun ki, bəzi anti-Azərbaycan, anti-türk, xüsusən də erməni lobbisi və onun nəzarətində olan güclər hər vasitə ilə Azərbaycanı da bu prosesə cəlb etməyə cəhd edirlər. Bu məqsədlərinə nail olmaq üçün də ilk olaraq Azərbaycana qarşı informasiya savaşından istifadə edirlər. Həmin güclər nəzarətlərində olan xarici media resurslardan istifadə etməklə heç bir əsası olmayan feyk məlumatlar yaymaqla Azərbaycanla İran arasında süni gərginlik yaratmağa çalışırlar. Bir neçə gün öncə "The Telegraph"da İsrailin guya Azərbaycanda hansısa gizli aviabazasının olması və İranın da həmin bazaya zərbələr endirəcəyi barədə yazı dərc edilib. Bunun ardınca digər xarici media resursu İsrailin Azərbaycanda olan hərbçilərinin təcili olaraq ölkəni tərk etməsi barədə feyk müraciətini yayıb. Bu yazılar təbii ki, Azərbaycanla İran arasında münasibətləri pozmaqda maraqlı olan güclər tərəfindən sifarişlə yazılan məqalədir. Bu cür saxta informasiyalarla həmin güclər Azərbaycan haqqında xoşagəlməyən fikir formalaşdırıb həm beynəlxalq imicinə zərbə vurmaq, həm də bəzi ölkələrlə münasibətlərinə xələl gətirməyə çalışırlar. Azərbaycana qarşı başlanan informasiya müharibəsinin arxasında dayanan məqsəd budur.

Amma unudurlar ki, Azərbaycanda heç bir xarici ölkənin nəinki hərbi bazası, hətta hər hansı formada kiçik də olsa, hərbi qruplaşması yoxdur. Azərbaycanda Rusiyaya məxsus Qəbələdə RLS olub və Moskva həmin bazadan 2012-ci ilidə imtina edib.

2020-ci il 10 noyabrda 44 günlük müharibənin nəticəsi olaraq Azərbaycan-Rusiya-Ermənistan arasında imzalanan üçtərəfli birgə bəyanatın şərtlərinə uyğun Qarabağ bölgəsinə rus hərbi kontingenti yerləşdirilsə də, həmin qüvvələrə 2024-cü ilin mayında Azərbaycan ərazsini tamamilə tərk edib.

Azərbaycanda fərqli olaraq bu gün Ermənistanda Rusiyaya məxsus hərbi baza mövcuddur. Bundan əlavə olaraq Ermənistanın Türkiyə və İranla sərhədini rus sərhədçiləri mühafizə edir. Moskva ilə İrəvan arasında digər sıx hərbi əməkdaşlıq mövcuddur.

Bu azmış kimi, hazırda Ermənistan Qərb ölkələrinin hərbçilərini aktiv şəkildə öz ərazisində yerləşdirməklə məşğuldur.

Digər tərəfdən Prezident İlham Əliyev dəfələrlə bəyan edib ki, Azərbaycan, ümumiyyətlə, bölgədə hər hansısa eskalasiyanın yaranmasında maraqlı deyil. Hətta illər öncə İran-ABŞ və İran-İsrail arasında yaranan gərginliklərdə Prezident İlham Əliyev İranla münasibətlərin gərgin olduğu halda belə, digər ölkənin Azərbaycan ərazisindən İrana qarşı istifadə etməyəcəyini dəfələrlə bəyan edib.

Azərbaycan İranla normal qonşuluq münasibətlərinin qurulmasında maraqlıdır və yürütdüyü siyasət də buna xidmət edir. Sadəcə son dövrlərdə Azərbaycan-İran münasibətlərinin normallaşması, xüsusən də Məsud Pezeşkianın prezident seçilməsi həm erməni lobbisinin, həm Ermənistanın, həm də onların havadarlarının yuxusuna haram qatıb. Yaxşı anlamağa başlayıblar ki, İrəvanın yürütdüyü mövcud xarici siyasət nəticədə İrəvanla Tehran arasında ciddi problemlərə, hətta böhrana yol açacaq. Digər tərfədən İrəvanın Tehranla real iqtisadi və regional əməkdaşlığı heç də deyildiyi kimi deyil. Əksinə, Bakı ilə Tehranın hərtərəfli regional əməkdaşlığı üçün geniş imkanlar mövcuddur. "Şimal-Cənub" dəhlizi, Şərqlə Qərbi bağlayan Orta Dəhliz layihəsinin reallaşması, bu əməkdaşlıq imkanlarını daha da inkişaf etdirməklə Ermənistanı yenə də oyundakənar vəziyyətə salacaq. Bunu görən erməni lobbisi və onun havadarları hər vasitə ilə Azərbaycana qarşı informasiya savaşı açmaqla süni gərginlik yaratmağa çalışırlar. Amma bu feyk savaşı heç bir nəticə verməyəcək.