“İt hürər, karvan keçər”: Azərbaycanın uğurlarından narahat olanlar bilməlidir ki…
“Dünya bu gün mürəkkəb geosiyasi proseslər, qarşıdurmalar, müharibələr, iqtisadi sarsıntılar və qlobal kataklizmlərlə üz-üzədir. Bir çox dövlətlər böhranların ağırlığı altında çətinliklərlə mübarizə apararkən, Azərbaycan tamamilə fərqli bir inkişaf modeli ortaya qoyur. Prezident İlham Əliyevin rəhbərliyi ilə ölkəmiz yalnız çağırışlara müqavimət göstərmir, həm də onları milli maraqlara xidmət edən strateji fürsətlərə çevirməyi bacarır. Bunun nəticəsidir ki, beynəlxalq miyasda Prezident İlham Əliyev böhranları məharətlə idarə edən LİDER kimi qəbul edilir”.
Bunu Ölkə.az-a açıqlamasında Milli Məclisin deputatı Fəzail İbrahimli deyib.
Deputat əlavə edib ki, məhz bu uğurlar bəzi anti-Azərbaycan dairələri ciddi şəkildə narahat edir: “Çünki Azərbaycan artıq regionun deyil, daha geniş Avrasiya məkanının siyasi, iqtisadi və enerji xəritəsini formalaşdıran əsas aktorlardan birinə çevrilib. Buna görə də ölkəmizə qarşı hibrid təhdidlər, informasiya müharibələri və dezinformasiya kampaniyaları davamlı xarakter almaqdadır.
Son aylarda Azərbaycanın ardıcıl uğurları bunu bir daha təsdiqləyir. Ölkəmizin WUF13 kimi nüfuzlu beynəlxalq tədbirə yüksək səviyyədə ev sahibliyi etməsi, ardınca Bakı Enerji Həftəsinin qlobal enerji gündəminin əsas platformalarından birinə çevrilməsi, ABŞ Prezidenti Donald Trampın Prezident İlham Əliyevə ünvanladığı məktub və Vaşinqtonun Bakının həyata keçirdiyi çoxvektorlu siyasətə verdiyi yüksək qiymət təsadüfi hadisələr deyil.
Bu hadisələr göstərir ki, Azərbaycan artıq Qərblə Şərqi, Şimalla Cənubu birləşdirən mühüm geosiyasi körpü rolunu uğurla yerinə yetirir. Prezident İlham Əliyevin uzaqgörən siyasəti nəticəsində ölkəmiz sabitlik, təhlükəsizlik, enerji əməkdaşlığı və beynəlxalq dialoq platforması kimi etibarlı tərəfdaş statusu qazanıb”.
Deputat bildirib ki, ABŞ-Azərbaycan münasibətlərinin yeni strateji əməkdaşlıq mərhələsinə qədəm qoyması da məhz bu reallığın nəticəsidir: “Lakin Azərbaycanın güclənməsi, nüfuzunun artması və beynəlxalq proseslərdə söz sahibinə çevrilməsi müəyyən dairələrin maraqlarına uyğun gəlmir. Buna görə də onlar müxtəlif vasitələrlə ölkəmizə qarşı qarayaxma kampaniyaları aparmağa çalışırlar.
2026-cı il iyunun 5-də CNN tərəfindən yayılan və anonim mənbələrə istinad edən təxribat xarakterli material da bu kampaniyanın növbəti həlqəsidir. Azərbaycanın guya hansısa gizli hərbi fəaliyyətlərdə iştirak etdiyini iddia edən bu cür əsassız məlumatlar nə faktlara, nə məntiqə, nə də beynəlxalq hüququn prinsiplərinə söykənir. Məqsəd birdir-Azərbaycanın beynəlxalq nüfuzuna zərbə vurmaq, regionda sülh və əməkdaşlıq proseslərinə kölgə salmaq.
Təsadüfi deyil ki, mühüm beynəlxalq tədbirlər və siyasi proseslər ərəfəsində oxşar informasiya hücumları mütəmadi olaraq təkrarlanır. Məqalənin yayılmasından dərhal sonra eyni narrativin müxtəlif media platformalarında və sosial şəbəkələrdə sürətlə tirajlanması bunun əvvəlcədən planlaşdırılmış informasiya əməliyyatı olduğunu göstərir.
Halbuki Azərbaycan dəfələrlə bəyan edib ki, onun ərazisində heç bir xarici dövlətin hərbi bazası və ya qoşunları yerləşmir. Azərbaycan ərazisindən üçüncü dövlətlərə qarşı hər hansı qeyri-dost fəaliyyətin həyata keçirilməsi mümkün deyil və bu, ölkəmizin xarici siyasət prinsiplərinə tamamilə ziddir. Bunu Prezident İlham Əliyev dəfələrlə bəyan edib. Nəinki bəyan edib, Azərbaycan böhranların danışıqlar, sülh yolu ilə həllinə dəstək verib. Konkret İrana gəldikdə isə, Azərbaycan bu ölkənin üzləşdiyi çətin günündə dünyaya bir daha qonşuluq, insanlıq nümunəsi nümayiş etdirərək humanitar yardım göstərib. Davamlı olaraq İran prezidenti ilə telefon danışıqları olur. Azərbaycan digər ölkələrdən fərqli olaraq nəinki qonşuluğunda, ümumiyyətlə dünyanaın digrə bölgələrində də hər hansı bıhranaın, katlizmlərin qarşıdurma və toqquşma ilə müşaiyət olunan geosiaysi savaşlarda maraqlı deyil. Çünki belə böhranlar qlobal və regional sülühə, təhlükəsziliyə, normal əməkdşalıq münasibətlərinin quurlmasın problemlər yaradır.
Əslində bu cür hücumlar Azərbaycanın zəifliyindən deyil, gücündən qaynaqlanır. Güclü dövlətlərə qarşı kampaniyalar aparılır. Uğur qazanan ölkələr hədəfə çevrilir. Azərbaycan isə son illərdə əldə etdiyi nailiyyətlərlə bir çoxlarının hesablarını pozub, planlarını alt-üst edib.
Lakin tarix göstərir ki, qarayaxma kampaniyaları ilə inkişafın qarşısını almaq mümkün deyil. Azərbaycan öz yolunu müəyyən edib və bu yol milli maraqlara, müstəqilliyə, güclü dövlət quruculuğuna və beynəlxalq nüfuzun artırılmasına xidmət edir.
Xalqın dəstəyi və Prezident İlham Əliyevin qətiyyətli liderliyi ilə ölkəmiz qarşısına qoyduğu bütün strateji hədəflərə nail olacaq. Bu gün Azərbaycana qarşı müxtəlif platformalarda hücum edənlər, dezinformasiya yayanlar və qarayaxma kampaniyaları quranlar gec-tez dəyişən geosiyasi reallıqları qəbul etməyə məcbur olacaqlar.
Bu qarayaxma kampaniya “it hürər, karvan köçər” misalını xatırladır. Kimsə bu yolla Azərbaycanı tutduğu strateji inkişaf yolundan, hədəflərindən yayındıra bilməz. Amma onu da unutmaq lazımdır ki, gec-tez bu qarayxma kampaniyasını həyata keçirənlər Prezident İlham Əliyevlə görüşmək, onun liderliyini etiraf edib, Azərbaycanla münasibətlər qurmaqda maraqlı olduqlarını deyəcəklər günlər də uzaqda deyil. Çünki biz artıq son illərdə belə hallaırn çox şahidi oluruq. Vaxtilə Azərbaycana qarşı qərəzli mövqe sərgiləyən dairələrin nümayəndələri bu gün Bakı ilə əməkdaşlıq yolları axtarır, Prezident İlham Əliyevlə görüşləri özləri üçün mühüm siyasi hadisə hesab edirlər. Bu, Azərbaycanın artan nüfuzunun və dövlət başçısının beynəlxalq arenada qazandığı böyük etimadın göstəricisidir.
Karvan isə yoluna davam edir. Azərbaycanın inkişaf karvanı da bütün maneələrə, təzyiqlərə və qarayaxma kampaniyalarına baxmayaraq irəliləyir. Çünki bu yol güclü liderliyin, milli birliyin və strateji baxışın yoludur. Bu yol Azərbaycanın daha böyük uğurlarına, daha qüdrətli dövlətə və daha nüfuzlu gələcəyinə aparan yoldur”.
Mürtəza Bünyadlı
