Ermənistan sabah bu iki seçimdən birini edəcək: Sülhü, ya da…
“Sabah Ermənistanda keçiriləcək parlament seçkiləri təkcə bu ölkənin daxili siyasi həyatının növbəti mərhələsi deyil. Bu seçki bütövlükdə Cənubi Qafqazın gələcək təhlükəsizlik arxitekturasına, regional əməkdaşlığın perspektivlərinə və sülh prosesinin taleyinə təsir göstərə biləcək mühüm siyasi hadisədir.
Məhz buna görə də seçkilər yalnız İrəvanda deyil, regionun və dünyanın müxtəlif siyasi mərkəzlərində diqqətlə izlənilir. ABŞ, Avropa İttifaqı, Rusiya, İran, Türkiyə və Azərbaycan üçün bu seçkinin nəticələri müxtəlif geosiyasi mənalar daşıyır”.
Bunu Ölkə.az-a açıqlamasında Milli Məclisin VI çağırış deputatı İltizam Yusifov deyib.
O bildirib ki, bu seçkinin ən böyük əhəmiyyəti Ermənistanın özü üçün olacaq: “Çünki sabah erməni seçicisi faktiki olaraq yalnız siyasi partiyalar arasında deyil, iki fərqli gələcək arasında seçim edəcək.
Sülh, yoxsa qeyri-müəyyənlik?
2020-ci ildə baş vermiş İkinci Qarabağ müharibəsindən sonra regionda tamamilə yeni geosiyasi reallıq formalaşıb. Azərbaycan hərbi-siyasi müstəvidə yeni vəziyyət yaradıb və sonrakı mərhələdə diqqəti regionda dayanıqlı sülhün təmin edilməsinə yönəldib.
Bakının irəli sürdüyü əsas gündəlik aydındır: Azərbaycana qarşı ərazi iddiasından imtinanı nəzərdə tutan konstitusiya islahatı, Zəngəzur dəhlizi və digər kommunikasiyaların açılması, Naxçıvanla Bakı arasında maneəsiz gediş-gəlişin təmin olunması, iqtisadi əməkdaşlığın genişləndirilməsi və regionun qarşıdurma məkanından əməkdaşlıq platformasına çevrilməsi. Bu baxımdan sabahkı seçkilər müəyyən mənada Ermənistanın sülhə, yoxsa yenidən gərginlik siyasətinə üstünlük verəcəyini göstərəcək.
Bakı və Ankara üçün əsas məsələ nədir?
Azərbaycan və Türkiyə üçün əsas məsələ Ermənistan daxilində hansı siyasi qüvvənin hakimiyyətə gəlməsindən daha çox, yeni hakimiyyətin sülh prosesinə münasibətidir.
Bakı və Ankara üçün əsas prioritet bölgədə düşmənçilik səhifəsinin bağlanması və bunun üçün qonşulara qarşı ərazi iddialarından imtina, iqtisadi əməkdaşlığın genişləndirilməsi və kommunikasiya xətlərinin açılmasıdır.
Eyni zamanda Bakı Ermənistanın onilliklər ərzində həyata keçirdiyi siyasəti də unutmur. Bu səbəbdən Azərbaycanın yanaşması emosiyalara deyil, konkret hüquqi və siyasi təminatlara əsaslanır.
Ermənistanın qarşısında duran strateji seçim
Ermənistan bu gün mürəkkəb seçim qarşısındadır. Bir tərəfdə regional inteqrasiya, yeni iqtisadi imkanlar, nəqliyyat marşrutlarının açılması, investisiyaların cəlbi və qonşularla normal münasibətlər yolu dayanır.
Digər tərəfdə isə geosiyasi qarşıdurmaların davam etməsi, xarici güclərin rəqabət meydanına çevrilmək, vassal, kimlərinsə əlində alət olmaq rolunu oynamaq, iqtisadi məhdudiyyətlər və uzunmüddətli qeyri-müəyyənlik riski… Bu baxımdan indi sülhün açarı İrəvandadır.Nəticə etibarı ilə sabahkı seçkilər Ermənistan vətəndaşlarının hansı gələcək modelinə üstünlük verəcəyini göstərəcək.
Bu baxımdan sülh prosesinin növbəti mərhələsinin sürəti və nəticəsi böyük ölçüdə İrəvanda veriləcək siyasi qərarlardan asılı olacaq.
Bakı bütün ssenarilərə hazırdır
Sabahkı seçkilərdən sonra hansı qüvvənin hakimiyyətə gəlməsindən asılı olmayaraq, Azərbaycan öz milli maraqlarına əsaslanan siyasətini davam etdirəcək.
Bakı həm sülh gündəliyinin irəliləməsinə, həm də mümkün risklərin idarə olunmasına hazırdır. Lakin Ermənistan üçün vəziyyət fərqlidir. Çünki bu seçkilərin nəticələri ölkənin gələcək inkişaf trayektoriyasına, regional layihələrdə iştirak imkanlarına və beynəlxalq mövqeyinə birbaşa təsir göstərəcək.
Məhz buna görə də sabahkı səsvermə adi parlament seçkisi deyil. Bu seçki Ermənistanın gələcək onilliklərdə hansı istiqamətdə inkişaf edəcəyini müəyyənləşdirəcək strateji qərardır.
Əslində seçki bülletenində yazılan adlardan daha vacib olan məsələ Ermənistanın hansı yolu seçəcəyidir: regional əməkdaşlıq və inkişaf yolu, yoxsa yeni risklər və qeyri-müəyyənliklər yolu.
Bu suala cavabı isə sabah Ermənistan seçicisi verəcək”.
Mürtəza
