Azərbaycanın aqrar sektoru 30 milyondan artıq əhalini ərzaqla təmin etməyə imkan verir - Deputat
Azərbaycanda kənd təsərrüfatının inkişafı üçün sığorta mexanizmləri işlək vəziyyətə gətirilməli və fermerlər üçün əlçatan maliyyə rejimi yaradılmalıdır.
Ölkə az xəbər verir ki, bunu deputat Əli Məsimli parlamentdə “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”ndan irəli gələn vəzifələr barədə ictimai dinləmədə deyib.
Deputatın sözlərinə görə, kənd təsərrüfatında risklərin qarşılanması üçün sığorta mexanizmlərinin gücləndirilməsi vacibdir.
“Bu mexanizmlər işləməsə, həm kəndlilərə böyük zərbə dəyəcək, həm də qiymətlər qalxacaq. Makroiqtisadi baxımdan kənd təsərrüfatının əsas missiyalarından biri inflyasiyanın aşağı salınmasına təsir göstərməkdir”, - Əli Məsimli deyib.
O qeyd edib ki, Azərbaycanın aqrar sahədə potensialı hazırkı 10,2 milyon əhalini deyil, bundan üç dəfə artıq əhalini ərzaqla təmin etməyə imkan verir.
Deputat bildirib ki, bu potensialdan orta səviyyədə istifadə olunsa, Azərbaycan nəinki daxili tələbatı ödəyə bilər, həm də aqrar-sənaye məhsulları üzrə 5-6 milyard dollarlıq ixrac imkanına malik olar.
Əli Məsimli xüsusi aqrar-sənaye bankının yaradılmasını da vacib hesab edir.
“Azərbaycanda xüsusi aqrar-sənaye bankının yaradılması və əlçatan faizlərlə kreditlərin verilməsi çox vacibdir. Torpağa bağlı insan kreditdən sui-istifadə etməz. O, krediti təsərrüfatının inkişafına, ailəsini dolandırmağa və kəndin inkişafına yönəldəcək”, - deputat vurğulayıb.
Mürtəza
