Tarixi yazan yenə də Bakıdır

Bunu Ölkə.az-a açıqlamasında Milli Məcliisn deputatı Elnarə Akimova deyib.

Onun sözlərinə görə, Heydər Əliyev Mərkəzində keçirilən açılış mərasimi ilk dəqiqələrdən öz möhtəşəmliyi ilə seçildi. “Dünyanın müxtəlif ölkələrindən gələn alimlərin, dövlət rəsmilərinin, beynəlxalq təşkilatların nümayəndələrinin və mədəniyyət xadimlərinin eyni məkanda toplaşması Bakının yenidən türk dünyasının fikir paytaxtına çevrildiyini nümayiş etdirirdi. Bu zalda təkcə insanlar deyil, yüz ilin yaddaşı görüşürdü”, - o vurğulayıb.
Deputat əlavə edib ki, mərasimdə Azərbaycan Prezidenti İlham Əliyevin tədbir iştirakçılarına ünvanladığı müraciət xüsusi əhəmiyyət daşıyırdı: “Dövlət başçısının mesajı bir daha göstərdi ki, Azərbaycan türk dünyasının birliyini yalnız siyasi platformalarda deyil, elm, mədəniyyət və mənəvi dəyərlər müstəvisində də strateji istiqamət hesab edir. Türkiyə, Qazaxıstan, Qırğızıstan və Özbəkistan prezidentlərinin göndərdikləri müraciətlər isə ortaq iradənin və qarşılıqlı etimadın ən aydın ifadəsinə çevrildi. Fərqli paytaxtlardan gələn bu mesajların eyni zalda səslənməsi bir həqiqəti təsdiqlədi: türk dünyasının ürəyi eyni ritmlə döyünür.

Birinci Türkoloji Qurultayın yüz illik yoluna həsr olunmuş videoçarx nümayiş etdirilərkən zalda təkcə tarix izlənilmirdi. Sanki bir əsr əvvəl Bakıda səslənən ideyalar yenidən canlanır, repressiyalara məruz qalan alimlərin, böyük türkoloqların və maarifçilərin arzuları bugünkü reallıqla qovuşurdu. Keçmişlə bu gün arasında görünməz, lakin son dərəcə möhkəm bir körpü qurulurdu.

Açılış mərasiminin ən yaddaqalan məqamlarından biri isə möhtəşəm konsert proqramı oldu. Türk dünyasının müxtəlif ölkələrindən gələn incəsənət ustalarının eyni səhnədə çıxış etməsi sadəcə musiqi gecəsi deyildi. Bu, ortaq köklərin, ortaq ruhun və ortaq mədəniyyətin sənət dili ilə ifadəsi idi. Azərbaycanın, Türkiyənin, Qazaxıstanın, Qırğızıstanın, Özbəkistanın və digər türk xalqlarının musiqisi, rəqsləri və səhnə nümunələri bir daha sübut etdi ki, sərhədlər dövlətləri ayıra bilər, amma mədəniyyət ürəkləri birləşdirir. Zaldakı alqışlar yalnız sənətə verilən qiymət deyildi, türk dünyasının həmrəyliyinə göstərilən ehtiram idi.

Bu gün Türk Dünyası Həftəsi yalnız Bakıda keçirilən beynəlxalq tədbirlər silsiləsi deyil. Bu həftə yüz il əvvəl əsası qoyulan böyük ideyanın müasir dövrdə yeni mərhələyə qədəm qoymasının rəmzidir. Elm adamlarının müzakirələri, beynəlxalq konqres, dövlət başçılarının mesajları və möhtəşəm mədəniyyət proqramı vahid bir həqiqəti ortaya qoyur: türk dünyası artıq ortaq tarixini yalnız xatırlamır, ortaq gələcəyini də birlikdə qurur.

Tədbirlərin Şuşa, Xankəndi və Ağdamda davam edəcək olması isə bu mənzərəyə xüsusi məna qazandırır. Bu, yalnız coğrafiyanın deyil, tarixin də bütövləşməsidir. Qarabağda keçiriləcək tədbirlər Azərbaycanın dirçəlişini, türk dünyasının həmrəyliyini və ortaq dəyərlərə sadiqliyini bütün dünyaya nümayiş etdirəcək.

Bir əsr əvvəl Bakıda başlayan yol bu gün daha geniş üfüqlərə açılır. O gün alimlərin və ziyalıların qurduğu fikir körpüləri bu gün dövlətlərin, xalqların və mədəniyyətlərin əməkdaşlıq yollarına çevrilib. "Türk Dünyası Həftəsi"nin möhtəşəm açılış mərasimi bir daha göstərdi ki, tarix yalnız xatırlanmaq üçün deyil, davam etdirilmək üçün yazılır. Və bu gün həmin tarixi yazan şəhərin adı yenə də Bakıdır”.

Mürtəza