Deputat xəstəxanalara kiberhücumlarla bağlı məsələ qaldırdı

Ölkə.az xəbər verir ki, bunu deputat Müşfiq Məmmədli iyulun 7-də parlamentdə “İnformasiya, informasiyalaşdırma və informasiyanın mühafizəsi haqqında” qanuna dəyişiklik layihəsinin müzakirəsi zamanı deyib.

O qeyd edib ki, bu gün artıq informasiya təhlükəsizliyi yalnız texniki məsələ deyil: “Bu, milli təhlükəsizliyin, iqtisadi sabitliyin, dövlət idarəçiliyinin və vətəndaşların hüquqlarının qorunmasının ayrılmaz tərkib hissəsidir. Dövlət xidmətlərindən bank əməliyyatlarına, səhiyyədən təhsilə qədər bütün sahələr rəqəmsal platformalara əsaslanır. Deməli, həmin platformaların təhlükəsizliyi də dövlətin strateji prioritetlərindən biri olmalıdır”.

Deputat bildirib ki, qanun layihəsinin əsas üstünlüyü ondan ibarətdir ki, ilk dəfə olaraq “informasiya təhlükəsizliyi”, “kibertəhlükəsizlik”, “kritik informasiya infrastrukturu”, “Milli CERT”, “SOC”, “rəqəmsal tədqiqat”, “rəqəmsal dəlil” kimi anlayışlar vahid hüquqi sistem daxilində dəqiq müəyyən edilir və onların fəaliyyət mexanizmləri tənzimlənir:  

“Mən həkim və Səhiyyə komitəsinin üzvü kimi xüsusilə qeyd etmək istərdim ki, səhiyyə sektoru artıq ən həssas informasiya sistemlərindən biridir. Elektron xəstəlik tarixçələri, laborator məlumatlar, tibbi sığorta sistemləri və telemedisina xidmətləri kibertəhlükəsizliyin yüksək səviyyədə təmin edilməsini zəruri edir. Tibb müəssisələrinə yönələn kiberhücumlar yalnız məlumat itkisinə deyil, bəzən insanların həyat və sağlamlığı üçün də real təhlükə yarada bilər. Bu baxımdan layihənin müddəaları səhiyyə sisteminin rəqəmsal dayanıqlığını gücləndirmək baxımından da xüsusi əhəmiyyət daşıyır”.

Müşfiq Məmmədli digər mühüm yenilik kimi rəqəmsal inkişaf layihələrinin əlaqələndirilməsi və maliyyələşdirilməsinə dair vahid yanaşmanın tətbiq edilməsini göstərib: “Bu yanaşma dövlət vəsaitlərinin daha səmərəli istifadəsinə, layihələrin təkrarlanmasının qarşısının alınmasına və rəqəmsal inkişaf sahəsində vahid dövlət siyasətinin formalaşmasına xidmət edəcək№. 
Deputat hesab edir ki, bu qanun layihəsi Azərbaycanın rəqəmsal inkişaf strategiyasına, milli kibertəhlükəsizlik siyasətinə və dövlət idarəçiliyinin müasirləşdirilməsi istiqamətində həyata keçirilən islahatlara tam uyğun gəlir.

Mürtəza