Azərbaycanın sözü bu dəfə də eşidildi - İsrail qərarını dəyişdi
Bunu Ölkə.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev deyib.
O bildirib ki, məhz İsraildə qondarma “erməni soyqırımı”nın tanınması ilə bağlı təşəbbüsün qarşısının alınması da bunun bariz nümunəsidir: “Burada söhbət təkcə Türkiyənin maraqlarına toxunan bir mövzudan getmirdi. Bu məsələ eyni zamanda Azərbaycanın milli maraqlarına, regiondakı geosiyasi balans siyasətinə və Bakı-Ankara strateji müttəfiqliyinin mahiyyətinə zidd idi. Azərbaycan bu təşəbbüsün yalnız Türkiyəyə qarşı yönəlmiş siyasi addım olmadığını, həm də dolayısı ilə öz strateji maraqlarına toxunduğunu düzgün qiymətləndirdi və vaxt itirmədən hərəkətə keçdi”.
Komitə sədri vurğulayıb ki, Azərbaycan üçün “erməni soyqırımı” iddiaları yalnız tarixi polemika və ya Türkiyə-Ermənistan münasibətlərinə aid məsələ deyil: “Bu, birbaşa regionda formalaşdırılmağa çalışılan siyasi narrativlərin, təzyiq alətlərinin və anti-Türkiyə, dolayısı ilə anti-Azərbaycan gündəliyinin bir hissəsidir. Türkiyəyə qarşı yönələn belə təşəbbüslər istər-istəməz Azərbaycan üçün də həssas məsələdir. Çünki Bakı ilə Ankara arasında münasibətlər dostluq və ya tərəfdaşlıq çərçivəsini çoxdan aşaraq, strateji müttəfiqlik, təhlükəsizlik, enerji, nəqliyyat və regional güc balansı üzərində qurulub.
Bu baxımdan İsraildə belə bir təşəbbüsün gündəmə gəlməsi təbii olaraq Bakıda ciddi narahatlıq doğurmalı idi və doğurdu da. Azərbaycan məsələyə məhz bu prizmadan yanaşdı: burada söhbət yalnız qardaş Türkiyənin maraqlarının müdafiəsindən deyil, həm də Azərbaycanın öz geosiyasi və milli maraqlarının qorunmasından gedirdi”.
A.Nağıyevin fikrincə, məsələnin ən diqqətçəkən tərəfi Azərbaycanın bu prosesə reaksiyasının forması oldu. O deyib ki, Bakı nə emosional ritorikaya üstünlük verdi, nə də məsələni açıq diplomatik qalmaqala çevirdi. Əksinə, Azərbaycan diplomatiyanın klassik və effektiv alətlərindən istifadə etməklə məsələnin həllinə nail oldu.
“Proses emosional qarşıdurmaya keçmədən dayandırıldı, təşəbbüs donduruldu və irəli aparılmadı. Ən önəmlisi isə bu nəticə elə bir formada əldə olundu ki, nə Azərbaycan-İsrail münasibətlərinə zərbə dəydi, nə də Türkiyə ilə həmrəylik xəttində hansısa boşluq yarandı. Bununla da Azərbaycan həm İsraillə strateji tərəfdaşlığını qorumağı bacardı, həm Türkiyənin milli maraqlarına toxunan həssas məsələdə qəti mövqe nümayiş etdirdi, həm də iki tərəf arasında əlavə gərginlik yaradacaq prosesin qarşısını aldı. Başqa sözlə, Bakı bu məsələni elə həll etdi ki, nəticədə hamı qazandı”, - Müdafiə, təhlükəsizlik və korrupsiya ilə mübarizə komitəsinin sədri söyləyib.
O əlavə edib ki, bu eyni zamanda “İsrailpərəst Bakı” iddialarına ən yaxşı cavab idi.
“Bu hadisənin başqa mühüm tərəfi də var. Son illərdə müxtəlif dairələr Azərbaycanın İsraillə münasibətlərini manipulyasiya etməyə, Bakını guya “İsrailpərəst xətt”də göstərməyə və bunun üzərindən siyasi spekulyasiya aparmağa çalışırdılar. İsraildə “erməni soyqırımı” təşəbbüsünün dondurulması isə həmin iddialara ən tutarlı cavablardan biri oldu”.
Deputat vurğulayıb ki, bu, Bakının yürütdüyü diplomatiyanın daha bir uğurlu səhifəsi kimi qiymətləndirilməlidir:
“Azərbaycan bir daha sübut etdi ki, milli maraqlarına uyğun olmayan məsələdə prinsipial mövqe sərgiləyir, amma bunu elə formada edir ki, nə münasibətlər dağılır, nə də strateji tərəfdaşlıqlar zədələnir. Əksinə, nəticə etibarilə həm problem həll olunur, həm də Bakı regional sabitləşdirici və etibarlı strateji aktor kimi mövqeyini daha da gücləndirir”.
Mürtəza
