Putin dalana dirənsə bu addımı atacaq - Türkiyə ilə...
Bu sözləri Ölkə.Az-a açıqlamasında politoloq Əziz Əlibəyli deyib. Rusiyanın Moldovaya da hərbi müdaxilə edəcəyi ilə bağlı ehtimallardan danışan ekspert sözlərinə belə davam edib:
“Rusiyanın Ukrayna ilə kifayətlənməyəcəyi ilə bağlı iddia buradan qaynaqlanır ki, Rusiya cəbhənin yöntəmini dəyişə, psixoloji savaş apara bilər. Əslində, Rusiya gələcəkdə baş verəcək savaşların preventiv olaraq qarşısını almaq üçün öz ərazisindən və sərhədlərinin yanından daha uzaq ərazilərə müharibəni daşımaq ehtimalından irəli gələ bilər. Bu mənada Moldovanın adının tez-tez hallanması mümkündür.
İkincisi, atdığım xəritədən də göründüyü kimi əgər biz ölkələri çıxsaq, bütövlükdə müharibə bir növ dəniz müharibəsinə də bənzəmiş olacaq. Çünki daxili hövzə müharibəsi, yəni Qara dəniz daxili müharibə Gürcüstan sektorundan başlayıb Rumıniya sektoruna qədər bütün ərazilərin Dnestryanı və Ukrayna, Azov daxil olmaqla Rusiyanın əlinə keçməsi anlamına gəlir. Bu isə gələcəkdə Türkiyə ilə qarşılaşması deməkdir. Yəni Rusiya dərin dövlətinin Bizans ideologiyasına söykənmiş və paytaxtı Konstantinopol (İstanbul-red.) olaraq düşündüyü ideyaya yönəlik hərəkət anlamına gəlir.
Bu xəritədə Rusiyanın hədəfləri var. Rusiya Moldovaya müdaxilə edə bilərmi? Əlbəttə, edə bilər. Bunun üçün Rusiyaya heç bir maneə yoxdur. ABŞ-ın yaxud NATO-nun reaksiyası nə cür olacaq? “Lent-liz” proqramı Ukrayanaya aid edilibsə, avtomatik Moldovaya da aid ediləcək. Və Ukraynada Qərbin mövqeyi nə cür olubsa, Moldova məsələsində də eyni cür olacaq”.
Rusiyanın apardığı müharibədə zəifləyib-zəifləməməsi ilə bağlı da danışan Ə.Əlibəyli söyləyib ki, bu, müharibənin ikinci, yəni psixoloji fazasına aiddir:
“Yəni psixoloji müharibədir. Psixoloji müharibədə əsas hədəf ordu deyil, silahdan istifadə edən əsgərin ruhi və psixoloji durumudur. Bu mənada Rusiyanın zəifləməsi qələbəyə ümidinin itirilməsi və resursların tükənməsinə yönəlmiş açıqlamalar da məhz həmin konteksti darmadağın etməyə hesablanır. Reallıq budur ki, əgər Rusiyanın doğrudan da zəifləməsini istəyirlərsə və gücünün tükənməsi ilə bağlı proqramların işə yaramasını gözləyirlərsə, o zaman addım atmalı və neft-qazı almamalı və Rusiyaya isti pulun girişini əngəlləməlidirlər”.
Billurə Yunus
