Sülhməramlı, Kəlbəcərə gedən maşınımızı niyə yoxlayırsan,xa0“dom Feyzulla bomba rabatay?!”
"Ölkə.Az" musavat.coma-a istinadən məlumat verir ki, ANAMA-nın yaydığı məlumatda da xatırladılıb ki, 2008-ci ildə Osloda imzalanan konvensiyanın şərtlərinə görə kasetli sursatların istehsalı, istifadəsi, daşınması və toplanması “Kasetli Sursatlara dair Beynəlxalq Konvensiya” ilə qadağan olunur. Amma 2020-ci ildə 44 gün davam edən Vətən müharibəsi dövründə Ermənistan silahlı qüvvələri tərəfindən bu növ sursatlar həm döyüş bölgələrində, həm də Azərbaycanın şəhərlərində yaşayan dinc əhaliyə qarşı dəfələrlə istifadə edilib.
Bu hadisədən bir neçə gün əvvəl Azərbaycan Prezidenti Gəncədə, Ermənistanın raket hücumuna məruz qalan ərazidə erməni faşizmi haqda danışmış, bütün dünyaya çağırış etmiş, terror hücumları nəticəsində həlak olan 26 gəncəlinin xatirəsinə həsr olunan Memareal Kompleksin təməlini qoymuşdu. Dövlət başçısı Ermənistanın digər şəhər və rayonlarımıza qarşı müharibə cinayətləri törətməsindən də danışmışdı. Erməni terrorizminin, faşizminin daha bir “əl işi” Yevlaxda “bəhrəsini verdi”, günahsız çoban həlak oldu.
Hadisə barədə bircə beynəlxalq təşkilatdan, yaxud özlərini vasitəçi adlandırıb, erməniləri on illərlə müdafiə edən həmsədr paytaxtlardan reaksiya gəldimi, Ermənistanın vandalizmi qınandımı? Təbii ki, bunu onlardan gözləməyə dəyməz, çünki heç vaxt olmayıb. Amma bir erməninin burnu qanasaydı, dərhal xaric səslər eşidərdik. Bu gedişlə erməni faşizmindən nə qədər əziyyətlər çəkəcək, qurbanlar verəcəyik, kim bilir? Elə bu günlərdə Kəlbəcərdə həlak olan hərbçimiz, 3 aylıq körpə qızcığazın atası da əslində Ermənistanın məkrli mövqeyinin qurbanı oldu. Bu qədər murdar qonşumuz olmasaydı, hərbçimiz də o durumda, çovğunlu havada donmazdı, şəhid olmazdı. Bizə çox əclaf bir qonşu rast gəlib. Çətin olacaq, qiyamətədək...
Azərbaycan postmüharibə dövründə də itkilər verir, Ermənistanın günahları, cinayətləri ucbatından. Amma baxın, bölgədə təhlükəsizliyə cavabdeh olan Rusiya sülhməramlıları Suqovuşandan Kəlbəcərə gedən Azərbaycanın maşın karvanını yoxlayırlar. Özü də necə? Bu barədə Rusiya Müdafiə Nazirliyinin yaydığı videokadrlara baxdıqda, adam heyrətlənir. Rus hərbçilər bir-bir yük yerlərinə baxmaqla kifayətlənmir, hətta kabinalara qalxıb, içərisinə baxırlar. Niyə? Nə axtarırlar? Bu maşınlar Azərbaycan ərazisində hərəkət edir və lazım olsa, Azərbaycanın müvafiq qurumları tərəfindən yoxlanılırlar. Yəqin ki, polis postlarında belə bir yoxlama həyata keçirilir. Bəs, sülhməramlı niyə yoxlamalıdır? “Dom Feyzulla bomba rabotay?!” Bu, nə deməkdir? Ayrı-ayrı ölkələr bəzən qarşılıqlı qaydada yoxlama güzəştləri edirlər, bir-birinə etimadla yanaşaraq, amma rus sülhməramlıları Azərbaycan torpağında Azərbaycan maşınlarının “bardaçok”larını belə, yoxlayırlar. Suqovuşandan yola çıxan yük maşınlarımızın son marşrutu Kəlbəcərdir, deməli, zəruri yük həmin ünvana çatdırılmalıdır, bunun rusa nə aidiyyəti var? Bir də ki, axı, biz Laçın dəhlizində, Azərbaycan-Ermənistan sərhədində dayanmış Rusiya sülhməramlılarından ermənilərə analoji münasibət görməmişik. Hətta bu barədə yayılan kadrlara diqqət çəkərək tənqidi yazılar yazmışıq, nə gələnlərin sənədləri yoxlanılır, nə yük yerləri. Ən uzağı sürücüdən şifahi hara getdiyini soruşurlar. Silah aparır, qumbara daşıyır, veclərinə deyil. Belə olan təqdirdə Kəlbəcərə gedən azərbaycanlıları hansı ixtiyarla təftiş edirlər? Bu maşınlar Xankəndi, ya Xocavəndin mərkəzinə yol alsaydı, haradasa məntiq axtarmaq olardı, təhlükəsizlik-filan...
Hə, belə çıxır ki, Rusiyanın Qarabağdakı kontingenti türklər demişkən, sadəcə göstəri yapır. Özü də ermənilərin yanında! Bu hissəsi daha da heyrətamizdir! Rus əsgərlər Azərbaycan maşınlarını yoxlayır, başlarının üstündə də Qarabağdakı erməni separatçıların nümayəndələri - “hərbi polisi”!!! Separatçı-terrorçu rejimin “polisi” ilə işbirliyinə nə ad vermək olar?! Dövlət başçısı bir müddət öncə sülhməramlılarla bağlı ciddi iradlarını səsləndirmişdi, görünür az olub... Araik Arutyunyan “hökuməti”, Vitaliy Balasanyanın rəhbərlik etdiyi quldurlarla işbirliyi olanlara “sülhməramlı” demək olarmı? Bakı Qarabağdakı terrorçuları 10-a yaxın maddə ilə beynəlxalq axtarışa verib, Rusiya bunu nə vaxtadək görməzdən gələcək?! Burada nə məntiq var, nə beynəlxalq hüquq, nə də centlmen razılaşma! Açıq-aşkar Azərbaycana qarşı təhdiddir! Erməniləri məmnun etmək və Azərbaycana təzyiq elementləri aydın görünür.
Azərbaycan Prezidenti bir neçə gün əvvəl Murov yolunun belə havalarda istifadə üçün əlverişsiz olmasından danışdı. Təsəvvür edin, Azərbaycan milyonlar xərcləyib Murovun altından 12 km-lik tunel çəkir, Rusiya hərbçiləri isə Ağdərə yolunu ermənilərin təhlükəsizliyi bəhanəsilə əlində “kozır” kimi saxlayıb, ara-sıra buradan maşınlarımızı müşayiət edirlər, onda da belə...
Rusiya Müdafiə Nazirliyinin ötən gecə, saat 04:00-da yaydığı kadrlar qurumun tabeliyində olan “TVZvezda” kanalı tərəfindən də efirə verilib: “Rusiya sülhməramlı kontingentinin hərbçiləri Dağlıq Qarabağ ərazisindən humanitar yük daşıyan iki Azərbaycan karvanının təhlükəsiz müşayiətini təmin ediblər”, təqdimatı ilə...Yenə də “Dağlıq Qarabağ”, yenə də “Madagiz” –“Getavan”- “Vank” marşrutu” təqdimatı ilə...
Hansı ki, adlar belədir: Suqovuşan-Qozlukörpü-Vəng!
Ermənilər çox məmnun qalıb bu yoxlamadan. Budur, erməni saytları Rusiya Müdafiə Nazirliyinə istinadən xəbəri manşetlərdən tirajlayıblar. Yazıblar ki, sülhməramlılar humanitar yüklü iki karvanın “artsax respublikası ərazisindən” təhlükəsiz keçidi təmin olunub. Adlar da beləcə: “Mataqis-Qetavan-Vank”. 42 km-lik keçidlə bağlı sülhməramlı kontingentin nümayəndəsi Mixail Kirilenkoya istinad da edilib. Ardınca da Azərbaycan və Türkiyəyə qarşı ittihamlar yer alıb erməni mənbələrində.
Əgər sülhməramlılar bu sayaq davranmasa, erməni tərəf başını daşa döyər, belə bir məlumat yaymaz, ən azı Qarabağdakı bir ovuc erməninin taleyini düşünərdi. Amma baxırlar ki, rus hərbçilər “erməni polisi”ni yanına alıb, Azərbaycan maşınlarına başını soxur, onlar da şirniklənib bizim işlərimizə burun soxurlar.
Rusiya sülhməramlılarının Suqovuşan “əməliyyatı” barədə videokadrların 1 fevralda, Azərbaycan Milli Məclisi Şuşa Bəyannaməsini ratifikasiya etdikdən bir neçə saat sonra, Türkiyə parlamentininsə sənədi müzakirəyə çıxarılmasından bir gün qabaq yayılması təsadüfi deyil...Sülhməramlılar Qarabağdakı erməniləri təğyiri-libas etməli, oradakı silah-sursatlar yığmalı, bölgəni tam təhlükəsiz vəziyyətə gətirməlidir, biz 1 il 3 aydır bunu gözləyirik. Amma bunlar bizim maşınları yoxlayırlar, özü də Kəlbəcərə gedənləri...Absurddur, anormallıqdır!
Rəsmi səviyyədə cavab verilməlidir və veriləcək də, şübhəsiz. Əvvəlcə diplomatik cavab, anlamasalar, davamı da gələcək. Qarabağdakı “erməni ordusu”nun yerində “hərbi polis” yaradıb, bunu bizlərə həzm etdirmək istəyənlər layiq olduqları cavabı alacaqlar, dövlətimizə inanırıq!
