Paşinyan üçün bəhanə qalmadı: müxaliflərinin fiaskosu
Paşinyana qarşı müxalifətin yaratdığı “Müqavimət hərəkatı”nda baş verən ciddi fikir ayrılığı və liderlik uğrunda gedən mübarizə, eyni zamanda aparılan mübarizənin effektsizliyi nəticəsində qurum parçalanıb.
Bunun anonsunu hələ ötən həftə “Daşnaksütun”un rəhbəri, parlamentin vitse-spikeri İşxan Saqatelyan keçirdiyi mətbuat konfransında verib. Saqatelyan bildirmişdi ki, Vanetsyan öz gələcək fəaliyyəti barədə mövqeyini açılaya bilər.
Müqavimət hərəkatının yaradıcılarından olan və ilk dəfə olaraq davamlı aksiyalara başlayan Ermənistan Milli Təhlükəsizlik Xidmətinin keçmiş direktoru, “Mənim Şərəfım” blokunun parlament fraksiyasının rəhbəri Artur Vanetsyan Müqavimət Hərəkatından ayrılıb.
Vanetsyan artıq parlamentdə təmsil olunan digər müxalifə qüvvələrdən fərqli olaraq deputat mandatından imtina edib.
Vanetsyan mandatdan imtina ilə bağlı yaydığı bəyanatda qeyd edir ki, artıq özünü bu parlamentdə görmür: “Səbəb bəllidir - Ermənistan vətəndaşı bizə öz səsini verdi ki, biz bu hakimiyyətin destruktiv fəaliyyətinin qarşısını alaq, ölkəni fəlakətdən xilas edək. Lakin məncə, bu parlament məqsədə çatmaq üçün effektiv platforma olmaqdan çıxıb”.
O daha sonra qeyd edib ki, liderlik etdiyi “Vətən” partiyasının Şurası fəaliyyətini parlamentdən kənarda davam etdirmək qərara gəlib: “Partiyanın qərarı ilə Ermənistan Respublika Partiyası ilə de-yure və de-fakto yaratdığımız “Mənim şərəfim var” blokunda da öz fəaliyyətini dayandırır”.
“Hraparak”ın yazdığına görə, il yarımdır ki, baş nazir Nikol Paşinyanın və bütün hökumətin istefası uğrunda mübarizə aparan müxalifətçilər vaxtaşırı taktikalarını dəyişirlər: “Ya birləşirlər, ya mərkəzləşdirilməmiş mübarizə elan edirlər, ya da parlamentdə mübarizə aparırlar. Aprelin 17-də Azadlıq meydanında oturaq aksiyaya ilk olaraq Artur Vanetsyan başlayıb və davamlı mübarizəyə start verib.
Aprelin 23-də parlament müxalifəti mübarizəyə qoşulub, “Daşnaksütun”un Ali Orqanının nümayəndəsi, “Ermənistan” blokundan parlamentin vitse-spikeri İşxan Saqatelyan hərəkətlərin əlaqələndirilməsini öz üzərinə götürüb. 1 may mitinqindən sonra müxalifət İrəvanın Fransa meydanında çadırlar quraraq davamlı aksiyalara başlayıb. İyunun 15-də isə meydandakı çadırlar sökülərək yığışdırılıb”, - mətbu orqanı qeyd edib.
Parçalanmaya yol açan ciddi səbəb də erməni müxalifətinin nəticə əldə etmədən meydanı tərk etməsi və gələcək mübarizə taktikası olub. Vanetsyanın müxalifətin gələcək mübarizə taktikası ilə baxışları üst-üstə düşmədiyindən və digərləri ilə mövqeləri uyğun olmadığından hərəkatı tərk etməli olub.
O, digər müxalifət deputatlarına mandatı təhvil etməyi təklif etsə də, bu məsələdə meydanda tək qaldı. Köçəryanın lider olduğu “Ermənistan” parlament fraksiyasından olan İşxan Saqatelyan deyib ki, mandatdan imtinanın vaxtı deyil.
Erməni mediası və sosial şəbəkələrin yazdığına görə, hətta müqavimət hərəkatında təmsil olunan liderlər bir-birinə qarşı kəskin ittihamlar səsləndiriblər. Bir-birini satqınçılıqda ittiham etməkdən belə çəkinməyiblər.
Vanetsyanın müxalifət birliyini tərk etməsinin digər səbəbi kimi isə prosesi onun başlatmasına baxmayaraq. Sonradan İşxan Saqatelyanın önə çıxaraq, onun fəaliyyətinə kölgə salması olub. Yəni Ermənistan müxalifətinin gələcək liderliyi uğrunda Vanetsyanla Saqatelyan arasında gedən gərgin mübarizə müxalifət hərəkatının parçalanmasına gətirib çıxarıb. Ermənistan müxalifətinin parçalanmasına və uğursuzluğa düçar olmasının əsas səbəblərindən biri də “Qarabağ klanı”nın, xüsusən də Köçəryan və Sarqsyanın, onların komanda üzvlərinin prosesdə aktiv iştirakı olub. Erməni cəmiyyəti köçəryanları, sarqsyanları və manukyanları birmənalı şəkildə qəbul etməyərək, onları erməni xalqının gələcəyi üçün deyil, öz maraqları naminə hakimiyyət uğrunda mübarizə aparan adlandırıb. Ona görə də erməni cəmiyyəti onları qocalar, köhnələr, erməni xalqının bu duruma düşməsinin əsas səbəbkarları adlandırıraq, onların keçirdiyi aksiyalara dəstək verməyiblər. Məhz ona görə də Paşinyanın hakimiyyətdən getməsi ilə başladılan mübarizə uğursuzluğa səbəb oldu. Uğursuzluğun digər amili isə xarici faktordur. Hansı ki müxalifətin xaricdə ümid etdiyi güclərin onlara lazımi dəstəyi verə bilməməsi və mövqelərinin zəifləməsi ilə bağlıdır.
Uğursuzluğun ən əsas və vacib məqamlarından biri də erməni cəmiyyətinin böyük bir qisminin üzləşdikləri bəlanın kökündə Qarabağ problemi və Azərbaycana qarşı əsassız ərazi iddiasının dayandığı düşüncəsinə sahib olmasıdır. Erməni cəmiyyəti müxalifətə dəstək verməməklə Ermənistanın gələcəyini Qarabağsız görür. Ermənistan müxalifətinin aksiyaları onu da sübut etdi ki, Qarabağ kartından bir siyasi alət kimi istifadə dövrü bitib.
Erməni cəmiyyəti Qarabağ kartının özünün ancaq və ancaq faciələrinin mənbəyi kimi gördüyündən, bundan xilas olmaq istəyir. Bunu Ermənistandakı siyasi müxalifət liderləri və onları dəstəkləyən xarici ölkələr də yaxşı bilir. Sadəcə, daxildəki siyasi qüvvələr varlıqlarını bacardığı qədər uzatmaq üçün, xarici qüvvələr də bacardıqları qədər maraqlarını təmin etmək üçün bu kartdan faydalanmağa çalışırlar. Bu proseslər bir daha onun sübut edir ki, Ermənistanda siyasi gündəliyi formalaşdıran Azərbaycandır və onun gücünün təsdiqidir! Bu gün Ermənistanda Azərbaycanın müəyyən etdiyi gündəliyi dəyişmək iqtidarına malik qüvvə yoxdur. İstənilən revanşizm hərəkətləri iflasa məhkumdur.
Beləliklə, Paşinyanın sülh sazişi ilə bağlı bəhanələri də qalmır...
Mürtəza
Ölkə.Az
