Ukrayna müharibəsinin 6 ayı - kimi uddu, kim uduzdu…
Fevralın 24-də başlayan Rusiya-Ukrayna müharibəsinin 6 ayını geridə qoymuş olduq. Amma müharibənin bundan sonra hələ nə qədər davam edəcəyi ciddi sual altındadır.
Rusiya-Ukrayna müharibəsinə iki ölkə arasındakı münaqişə kimi deyil, dünyanın yenidən şəkilləndirilməsində mühüm əhəmiyyət kəsb edən hadisə kimi baxılır. Yəni yeni dünya düzəni və gələcəyi bunun nəticəsindən asılıdır.
Ötən 6 ayda müharibədən kim uddu, kim qazandı məsələsi ciddi müzakirə olunmaqdadır.
Bu müddət ərzində çıxan nəticələr:
Birincisi, dünyada Rusiyanın hərbi qüdrəti, onun ordusu və hərbi texnikası baxımdan formalaşan mif tamamilə darmadağın edildi.
İkincisi, tamamilə olmasa da, əhəmiyyətli dərəcədə Rusiyanın müqavimət gücü qırıldı.
Üçüncüsü, Rusiyanın müqavimət gücünün qırılması nəticəsində NATO Rusiya sərhədlərinə doğru irəlilədi. Finlandiya və İsveç Alyansa üzv qəbul edildi.
Dördüncüsü, NATO Şərq istiqamətində mövqeyini daha da möhkəmləndirdi.
Beşincisi, Ukrayna müharibədə mənəvi-psixoloji üstünlüyü ələ ala bildi. Mənəvi-psixoloji üstünlük nəticəsində Rusiyanın Ukraynada sürətli işğalının qarşısı alındı. Bunun hərbi-siyasi qələbəyə çevrilməsi üçün dünya birliyinin, xüsusən də Qərbin Kiyevə əməli və ciddi dəstəyi olmalıdır.
Altıncısı, Rusiyanın imperializm siyasətinin qarşısı alınması istiqamətində böyük və ciddi bir koalisiya formalaşdırıldı. Hansı ki Rusiya bunu gözləmirdi və hesablamamışdı. Moskva Ukraynaya hücum edəndə qəti əmin idi ki, Avropanın ən əsas aparıcı ölkələrindən olan Almaniya, Fransa, İtaliya, Avstriya və digərləri bu koalisiyaya qoşulmayacaq. Amma tam əksi baş verdi. Vahid cəbhənin formalaşması, təkcə Rusiyanın işğlaçılıq siyasətini zəiflətmədi, eyni zamanda iqtisadi baxımdan ölkəyə ciddi zərbə oldu. Bu da öz növbəsində Rusiyanın qonşu regionlardakı hegemonluğunu, işğalçı imperialist siyasətini zəiflətməyə xidmət etdi və etməkdədir.
Rusiyaya qarşı formalaşan bu koalisiya vahidliyini qoruyub saxlayıb, iqtisadiyyatın çökdürülməsi istiqamətində sanksiyaları davam etdirərsə, o zaman ciddi uğurlu nəticələr əldə etmək mümkün olacaq.
Ukraynada gedən müharibə onu deməyə əsas verir ki, Qərb və beynəlxalq aləm Kiyevə müharibədə sınma nöqtəsini yaradıb, əks-hücum əməliyyatlarına başlaması istiqəmətində yetərli dəstəyi verə bilmir. Qərbin verdiyi dəstək ancaq və ancaq Ukrayna ordusunun rus qoşunlarının hücumlarını dəf etməyə və ya sürətini azaltmağa xidmət edir. Ona görə də müharibədə dönüşün əldə olunması üçün Qərb Kiyevə daha ciddi dəstək verib, Ukraynanın ərazi bütövlüyünün təmin olunmasına nail olmalıdır.
Əks təqdirdə, Ukrayna müharibədə ən yaxşı halda müdafiə mövqeyini möhkəmlədərək, hücumun qarşısını almaq gücünə malik ola biləcək. İndiyədək işğal olunmuş ərazilər Rusiyanın nəzarətində qalacaq. Yaranacaq belə bir vəziyyət isə Moskvanın xeyrinə olacaq. Kreml bunu qələbə kimi təqdim edəcək. Bu isə Kremlin yenidən revanş siyasətinə gətirib çıxara bilər. Bu gün Rusiyanın təsir dairəsindən xilas olmaq istəyən ölkələri narahat edən məsələ də budur. O baxımdan da həmin ölkələr bu gün Rusiyaya münasibətdə çox ehtiyatlı siyasət yürüdüb, balansı qorumağa çalışırlar.
Mürtəza Bünyadlı
Ölkə.Az
