ABŞ və Rusiya kəşfiyyat liderlərinin gizli görüşü: CİA şefi Putinə niyə təhdid mesajı göndərib

CİA şefi Uilyam Börnsün rusiyalı həmkarı Sergey Narışkini Ukraynaya və ya hər hansı NATO ölkəsinə nüvə zərbəsinin qarşılığında Rusiyanı gözləyən nəticələr barədə həm geniş məlumatlandırdığı, həm də üstüörtülü xəbərdarlıq etdiyi iddia olunur... Nüvə savaşına başlanılmasının Rusiya prezidenti Vladimir Putinin qəbul edə biləcəyi ən sonuncu qərar olacağı vurğulanıb...

"Ölkə.az" musavat.com-a istinadla bildirir ki, Ukrayna savaşının inkişaf istiqamətləri ABŞ və Qərbdə ciddi narahatlıq doğurmağa başlayıb. Kreml siyasi-diplomatik kanallar üzərindən Rusiya əleyhinə beynəlxalq koalissiyada təmsil olunan dövlətləri nüvə savaşı ilə təhdid edir. ABŞ və Qərbdə Kremlin bu təhdidləri hərbi-siyasi şantaj cəhdi kimi dəyərləndirilir. Ancaq Rusiyanın ən taleyüklü mərhələdə nüvə silahına əl atmayacağına da qətiyyən əmin deyillər.

Təbii ki, Kreml nüvə təhdidinə paralel olaraq, Rusiyanın şərtlərini də gündəmə gətirir. Rusiya Ukrayna savaş məkanında hazırda mövcud olan situasiya üzərindən sülh sazişinin imzalanmasını tələb edir. Kreml heç olmasa, indiki situasiyanın diqtə etdiyi şərtlər daxilində hərbi münaqişənin qeyri-müəyyən müddətə “dondurulması” ilə də razılaşa biləcəyini gizlətmir. Və bu, maliyyə-iqtisadi, xüsusilə də hərbi cəhətdən öz tarixinin ağır dövrünü yaşayan Rusiyanın fasiləyə, heç olmasa, “nə hərb, nə sülh” mərhələsinə ehtiyacı olduğunu göstərir.

Bəzi məlumatlara görə, hazırda Rusiya ABŞ və digər Qərb ölkələri ilə intensiv gizli danışıqlar aparmağa çalışır. Bu danışıqların ABŞ da daxil olmaqla, 20-yə yaxın Qərb ölkəsini əhatə etdiyi də bildirilir. Eyni zamanda, Kremlin başlatdığı gizli danışıqlar prosesinə prezident Vladimir Putinin xüsusi tapşırığı ilə Rusiya Təhlükəsizlik Şurasının rəhbəri Nikolay Patruşevin nəzarət etdiyi vurğulanır.

Maraqlıdır ki, belə gizli danışıqlardan birisi barədə mətbuata kifayət qədər ciddi məlumatlar sızıb. Üstəlik, məlumatlar o qədər önəmlidir ki, onların məqsədyönlü şəkildə sızdırıldığı qətiyyən şübhə doğurmur. Əks halda, ABŞ və Rusiya kəşfiyyat qurumları arasında birbaşa təmaslarda müzakirə edilmiş mövzular heç bir halda, belə təfsilatlı şəkildə ortaya çıxa bilməzdi.

Məsələ ondadır ki, Türkiyənin paytaxtı Ankarada ABŞ-ın nüfuzlu kəşfiyyat qurumu olan CİA-nin şefi Uilyam Börns Rusiya xarici kəşfiyyat xidmətinin direktoru Sergey Narışkin arasında gizli görüş keçirilib. Bu iki kəşfiyyat liderinin Ankaraya gəlişindən Türkiyə mediası belə, xəbər tutmayıb. Ancaq nə qədər də qəribə də olsa, bu gizli görüşdən sonra müzakirə edilmiş mövzular barədə ümumi məlumatlar yayıldı.

Məlumatı ictimailəşdirən qaynaqlar gizli görüşdə əsas mövzunun məhz Ukrayna savaşı və onun ətrafında yaranmış vəziyyətlə bağlı olduğunu iddia edirlər. Ancaq müzakirələrdə Ukrayna savaşının dayandırılması, sülh sazişinin imzalanması və ya münaqişənin “dondurulması” ilə bağlı məsələlərin ön planda olmadığı vurğulanır. Və bu baxımdan, gizli görüşün Rusiyanı qane edə biləcək məzmun daşımadığı iddia edilir.

CİA şefi rusiyalı həmkarı ilə Ukrayna savaşı məkanında nüvə silahından istifadə risklərini aşağı salmağın yollarını müzakirə edib. U.Börns ABŞ rəhbərliyi adından bəzi Kreml təmsilçilərinin Ukrayna ərazisində nüvə silahından istifadə oluna biləcəyi ilə bağlı məsuliyyətsiz təhdidlərindən imtina edilməsinin vacibliyini vurğulayıb. CİA şefi rusiyalı həmkarını Ukrayna ərazisinə nüvə zərbəsinin qarşılığında Rusiyanı gözləyən nəticələr barədə həm geniş şəkildə məlumatlandırıb, həm də üstüörtülü xəbərdarlıq edib.

Digər tərəfdən, CİA şefi bildirib ki, Ukraynaya və ya hər hansı NATO ölkəsinə nüvə zərbəsi Rusiya prezidenti Vladimir Putinin qəbul edə bildiyi sonuncu qərar olacaq. Bu, Ağ Evin Kremlə edə biləcəyi ən sərt xəbərdarlıq mesajı kimi də dəyərləndirilə bilər. Çünki, bu mesajda həm də birbaşa və açıq məzmunlu təhdidin olduğu da diqqətdən yayınmır.

Məsələ ondadır ki, CİA şefi U.Börns bu xəbərdarlıqla, Rusiya xarici kəşfiyyat xidmətinin direktoru S.Narışkin üzərindən prezident V.Putinə nüvə zərbəsi qərarından sonra Rusiyaya ən ağır zərbələr endiriləcəyini anlatmağa çalışıb. Həmin zərbələrdən sonrasa, prezident V.Putinin Rusiyanın növbəti addımları barədə hər hansı qərarlar qəbul etməsi qətiyyən mümkün olmayacaq.

Göründüyü kimi, ABŞ-ın Rusiyaya qarşı xəbərdarlıq ritorikası olduqca sərt və ağırdır. Bu ritorikada Rusiyanın bir dövlət kimi mövcudluğu belə, təhdid altına düşmüş olur. Kreml böyük ehtimalla bu təhdidlərin arxasında hansı təhlükəli nəticələr barədə eyhamların gizləndiyini anlamamış deyil. Və bu baxımdan, Rusiyanın nüvə savaşı ilə bağlı şantajının cavabsız qalmadığı açıq-aşkar nəzərə çarpır.

Belə anlaşılır ki, ABŞ Rusiyaya sadəcə, xəbərdarlıqla kifayətlənmir, mümkün nəticələri də ön plana çıxarır. Böyük ehtimalla əsas məqsəd Kremlin nüvə şantajının həmişəlik bloklanmsından ibarətdir. Rusiyaya anlatmaq istəyirlər ki, nüvə savaşı ilə bağlı təhdidlər heç bir nəticə verməyəcək. ABŞ və Qərb belə təhdidlər qarşısında geri çəkilərək, Rusiyaya güzəştə getmək niyyətində deyil.

Ona görə də, indi Rusiyanın necə davranacağı da böyük maraq doğurur. Belə ki, Kreml hazırda əvvəlkindən daha əlverişsiz duruma düşüb. Hər halda, Kremlin nüvə təhdidləri də artıq işə yaramır. Belə vəziyyətdə Rusiyanın qarşısında ən yaxşı halda, iki konkret seçim variantı qalmış kimi görünür. Yəni, Kreml indi ya geri çəkilməlidir, ya da ənənəvi təhdidlərini reallığa çevirmək riskinə üstünlük verməlidir. Halbuki, hər iki variant Rusiya üçün fəlakətdən başqa heç nə vəd etmir.