Paşinyandan gözlənilməz addım: Ermənistanda çaşqınlıq - SENSASİON DETALLAR

Ermənistan parlamentinin spikeri Alen Simonyanın iqtisadiyyatı nazirinin müavini postunda olan qardaşı arvadı Ani İsiryanın həbsi ölkədə ciddi ajiotaja səbəb olub. Nazir müavinin həbsindən  sonra hakim komandada hamı bir-birinə dəyib. Kimə nə deyəcəyini və hansı addım atacağını bilmir. Çünki son vaxtlarda Baş nazir Nikol Paşinyan komandasında önə çıxan fiqurları bir-bir sıradan çıxarmaq yolunu tutub.

Bundan öncə Təhlükəsizlik Şurasının katibi Armen Qriqoryanın ciddi fiqur kimi önə çıxmasından əndişələnən Paşinyan onun vurulması barədə komandasına göstəriş verib. Cəmiyyətdəki reputasiyasından qorxan Paşinyan yaxşı bilir ki, hansısa mərhələdə "ağaları" tərəfindən ona verilən sifarişi icra etməyəcəyi təqdirdə onu asanlıqla devirəcəklər. Ona görə də Paşinyan önə çıxan komanda yoldaşlarını özünə potensial rəqib gördüyündən sıradan çıxarma yolunu seçib.

Paşinyan Armen Qriqoryandan sonra parlamentin spikeri Alen Simonyanı "zərərsizləşdirmək" üçün yaxın ətrafı vasitəsilə ona təzyiq etməyə başlayıb. 

Ermənistan ekspert siyasi elitası İspiryanın həbsini və iki ay müddətinə ev dustağı edilib vəzifəsindən azad edilməsini Paşinyanın komandasına təzyiqi kimi dəyərləndirirlər.  

Erməni ekspert Arqişti Kiviryan məsələ ilə bağlı mövqeyini açıqlayaraq deyib ki, Paşinyan Ermənistan parlament sədrinin qohumunu təqib etməklə öz silahdaşlarını qorxudur.

Onun fikrincə, xırda diktatorlar hər zaman müəyyən hadisələrin günahını özlərində deyil, başqasında olduğunu göstərməyə çalışırlar. "Bu, yoldaşlarını qorxutmaq üsuludur ki, ona qarşı heç bir addım atmasınlar. Axı güc itkisi çox vaxt daxildən baş verir. Digər sual isə Paşinyanın özünün hakimiyyətə necə gəlməsidir”, - Kiviryan qeyd edib.

Hakim "Vətəndaş müqaviləsi" partiyasından olan deputat Vaaqn Aleksanyan bildirib ki, Ermənistanda heç bir şəraitdə korrupsiyaya yer yoxdur: "Mən özümü korrupsiyaya qarşı mübarizədə qabaqcıllardan biri hesab edirəm".

Bununla belə, konkret olaraq spikerin qardaşı arvadının həbsi məsələsinə gəldikdə Aleksaniyan cavab verməkdən yayınıb: “İcazə verin, bu haqda şərh verməyək. Mən məhkəmə qərarlarını şərh edə bilmərəm və belə bir səlahiyyətim də yoxdur”.

Komamda daxilində böhran və Simonyanla bağlı problemin olub-olmamasına gəldikdə Aleksanyan deyib ki, komandanın onunla problemlərin olması doğru deyil.

İqtisadiyyat naziri Vahan Kerobyan isə nazirlikdəki həbslərə, xüsusən də parlament sədrinin qardaşı arvadının həbsinə kəskin reaksiya verib.

"İnsanı səhlənkarlıqda ittiham etmək başqa, bunun korrupsiya olduğunu iddia etmək başqa şeydir. Korrupsiya rüşvət almağınız və ya qohumunuz üçün nəsə etmənizdir", - Kerobyan vurğulayıb.

Rəhbərlik etdiyi qurumdakı korrupsiya faktları ilə bağlı məsələyə aydınlıq gətirən nazir bunu istisna etməsə də, hazırda irəli sürülən ittihamları qəbul etməyib: "Özümdən başqa heç kimə 100 faiz təminat verə bilmərəm, lakin hazırkı ittiham və mənim bildiklərim onu ​​göstərir ki, bizim hərəkətlərimizdə qanunsuz heç nə yoxdur. Düşünmürəm ki, burada səhlənkarlıq var. 

Digər tərəfdən deyirlər ki, bu, açıq-aşkar korrupsiyadır, lakin bu “korrupsiya faktı”nın konkret nə olduğunu dəqiqləşdirmirlər".

Kerobyan məsələ ilə bağlı fikri və qərarı barədə baş nazirə məlumat verəcəyini və məsuliyyəti öz üzərinə götürəcəyini də bəyan edib.

Baş verən proseslər onu göstərir ki, Paşinyan komandasında ciddi böhran yaşanır və istənilən an ən gözlənilməz hadisələr baş verə bilər. 

Hələ bir neçə gün öncə Ermənistanın "Hraparak" nəşri dərc etdiyi yazıda qeyd edib ki, əgər Paşinyan Qərbin tələblərini yerinə yetirməsə, müqavilə imzalamaqdan imtina etsə və Rusiyaya qarşı aydın siyasət yürütməsə, o zaman Qərb planlarını tərəddüd etmədən və böyük məmnuniyyətlə həyata keçirəcək.

"Plana əsasən, Paşinyan Qriqoryanla əvəzlənəcək. Bu məsələ hazırda "Vətəndaş müqaviləsi" partiyasında geniş müzakirə olunan məsələlərdəndir. Komandadaxili müzakirələrdə Paşinyan əvvəlcə bu ssenarini ciddi qəbul etmirdisə, indi Armen Qriqoryanın Qərblə müstəqil oyunu onu narahat etməyə başlayıb", - erməni nəşri yazır.

Paşinyan hakimiyyətindən sızan məlumatlara görə, erməni baş nazir son vaxtlar uğraya biləcəyi siyasi xəyanət təhlükəsinə həmişə olduğundan daha ciddi yanaşmağa başlayıb. Yəni Qərbin Paşinyanı əvəzləmək üçün artıq “düyməyə” basması, onun canına vəlvələ salıb. Ona görə də komandada önə çıxan və nüfuza malik şəxsləri sıradan çıxarmaq yolunu seçib. Bu da Ermənistanda növbəti ciddi hakimiyyət böhranını qaçılmaz edir.

Mürtəza
Ölkə.Az