Avrokomissiyanın rəhbəri divarlara qarşı çıxdı

"Avropada divarlara yer yoxdur"

Ölkə.Az xəbər verir ki, Avropa Komissiyasının prezidenti Jan Klod Yunkerlə Avstriya kansleri Verner Fayman arasında baş tutan telefon danışığı zamanı tikilməsi planlaşdırılan divarlar müzakirə edilib.

Siyasətçilərin gəldiyi qənaətə görə, Avropa ölkələrinin sərhədlərində divarlar ucaldılmamalıdır.

"Avropada divarlara yer yoxdur" fikrinə gələn Yunker və Fayman qeyd ediblər ki, maksimum qısa müddət ərzində Avropa İttifaqı ölkələri liderlərinin sammiti zamanı qəbul edilmiş qərarlar həyata keçirilməlidir.

Onların sözlərinə görə, yalnız bu, regionda humanitar faciənin qarşısını ala bilər. Siyasətçilər əlavə edib ki, bir-biri ilə qarşılıqlı əlaqədə olmağa hazırdırlar.

Avstriya Sloveniyadan miqrant axınının qarşısını almaq üçün sərhəddə xüsusi texniki bəndlərin tikilməsi barədə qərar qəbul etmişdi.

Qeyd edək ki, bu il Suriya İraq və Əfqanıstandan Avropaya 800 mindən çox miqrant gəlib.

Rəşid Mustafazadə

Ölkə.Az