İsrailə dəyən zərər açıqlanıb – "Bu, son rəqəm qədər deyil…"

İsrailə qarşı İran tərəfindən həyata keçirilən raket hücumları nəticəsində ölkəyə dəyən maddi ziyanın ilkin qiymətləndirilməsi təxminən 10 milyard şəkel (təqribən 3 milyard ABŞ dolları) təşkil edir. Ölkə.Az xəbər verir ki, bu barədə İsrail Maliyyə Nazirliyi və Vergi Xidmətinin hesablamasına istinadən "Bloomberg" agentliyi məlumat yayıb.

Hesabata əsasən, bu məbləğə raket zərbəsi nəticəsində zədələnmiş binaların bərpası, habelə yerli biznes subyektlərinə ödənilən kompensasiyalar daxildir. Lakin agentlik qeyd edir ki, bu rəqəm yalnız mülki və iqtisadi zərərləri əhatə edir. Hərbi arsenalın, xüsusilə hava hücumundan müdafiə sistemlərinin sursatlarının tükənməsi ilə bağlı xərclər bu hesaba daxil edilməyib. Əgər bu xərclər də əlavə olunsa, yekun məbləğ qat-qat yüksək olacaq.

İsrailin maliyyə naziri Betsalel Smotriç daha əvvəl verdiyi açıqlamada bildirmişdi ki, ümumi zərərin 12 milyard dollara qədər yüksələcəyi gözlənilir.

Digər tərəfdən, İsrail Bankının rəhbəri Amir Yaron “Bloomberg”ə verdiyi müsahibədə bu rəqəmləri şişirdilmiş hesab edərək, ümumi ziyanın 6 milyard dollar ətrafında ola biləcəyini bildirib.

Ölkə.Az