Suyun altında iki əsrlik bir sirr: Amerikanın "Nessi"si kameraya düşdü
ABŞ ilə Kanada arasında yerləşən Şamplen gölü əsrlərdir həll olunmayan təbiət sirri ilə diqqət çəkir. Təxminən 200 kilometr uzunluğunda olan bu su hövzəsi dərinliklərində gizləndiyi iddia edilən nəhəng bir məxluq haqqında əfsanə ilə məşhurdur.
Ölkə.az xəbər verir ki, yerli sakinlərin "Champ” adlandırdığı bu canlı, Şotlandiyadakı məşhur Loç Nessu "canavarı"na bənzədildiyi üçün tez-tez "Amerikanın Nessi"si kimi təqdim olunur. O, adətən tarixdən əvvəlki dövrə aid sürünənlərdən biri olan plesiozavr formasında təsvir edilir.
Bu günədək çoxsaylı insanlar belə bir məxluq gördüklərini iddia etsələr də, bunu təsdiqləyən qəti sübut ortaya qoyulmamışdı. Lakin iki kinorejissorun montaj zamanı təsadüfən aşkar etdiyi görüntülər həm elmi dairələrdə, həm də sosial mediada geniş müzakirələrə səbəb olub.
Kelli Tabor və Riçard Rossi göldəki əfsanədən bəhs edən uşaq filminin çəkilişlərini tamamlayıblar. Çəkilişlərdən təxminən iki il sonra, 2025-ci ildə montaj prosesində görüntülərə böyük ekranda baxan Tabor 11 metrlik taxta qayıqlarının arxasında qeyri-adi hərəkətlilik müşahidə edib.
Suyun səthinin dərhal altında qayığın kəndirini izləyən iri bir siluet seçilib. Uşaqlıqdan bu gölün ətrafında böyüyən və yerli su canlılarını yaxşı tanıyan rejissor görüntüdəki cismin adi balıq olmadığını düşündüyünü bildirib.
Kadrlar böyüdüldükdə suyun altında ziqzaqvari hərəkət edən uzun və nazik boyun, eləcə də arxaya doğru genişlənən iri gövdə seçilib.
Şamplen gölünün suları palçıqlı dibə görə adətən bulanıq olur. Buna baxmayaraq, göl uzun illərdir bu tip iddialarla gündəmə gəlir.
Bölgədə qeydə alınan ilk rəsmi "canavar” müşahidəsi 1819-cu ilə təsadüf edir. Kapitan Krum adlı dənizçi Bulvagga körfəzi yaxınlığında təxminən 57 metr uzunluğunda, ilana bənzər və gözləri soyulmuş soğanı xatırladan iri qara məxluq gördüyünü qeyd etmişdi.
O vaxtdan bəri yüzlərlə oxşar iddia ortaya çıxıb. Bəzi insanlar bunun nəsli kəsilmiş dəniz sürünəni olduğunu düşünür. Digərləri isə milyonlarla il əvvəl yaşamış balina əcdadı hesab edilən zeuqledon növünün sağ qalmış nümayəndəsi ola biləcəyini irəli sürür.
Skeptiklər isə bütün müşahidələrin dalğalar, su üzərində üzən ağac parçaları və ya optik illüziyalardan qaynaqlandığını bildirirlər.
Kelli Tabor üçün bu mövzu sadəcə film ssenarisi deyil. O, universitet illərində dostları ilə birlikdə göldə olarkən suyun üzərində heç bir istiqamət dəyişmədən onlara doğru gələn böyük dalğa izi gördüklərini xatırlayır.
Onun sözlərinə görə, naməlum obyekt sahilə yaxınlaşarkən qəfil 90 dərəcə dönərək körfəzin digər tərəfinə istiqamət alıb və suyun səthinə çıxmadan yoxa çıxıb.
Yeni video görüntülər şəxsi xatirələrdən kənara çıxaraq elmi mübahisələrin mövzusuna çevrilib. Riçard Rossi qeydləri araşdırılması üçün mütəxəssislərə təqdim edib.
Qısa müddətdə televiziya dünyasının da diqqətini çəkən video məşhur aktyor Uilyam Şatnerin təqdim etdiyi sirr mövzulu sənədli filmdə nümayiş etdirilib.
Proqramın yaradıcıları hesab edirlər ki, bu görüntülər 1977-ci ildə çəkilmiş və uzun müddət "Champ” üçün ən güclü sübut sayılan məşhur Sandra Mansi fotosundan sonra əldə edilən ən diqqətəlayiq materialdır.
Əvvəlki şəkillərdən fərqli olaraq, yeni videoda qayığın görünməsi mütəxəssislərə obyektin ölçülərini hesablamaq üçün istinad nöqtəsi verir.
İnternetdə yüz minlərlə baxış toplayan görüntülərdən sonra rejissorlar bu yay göldə keçiriləcək ənənəvi festivala qatılmağı və əfsanə mövzusunda daha iki film üzərində işləməyi planlaşdırırlar.
Şamplen gölünün dərinliklərində əslində nə olduğu hələ də məlum deyil. Lakin "Champ” əfsanəsi artıq iki əsrdir insanların marağını və təxəyyülünü qidalandırmağa davam edir.(qaynarinfo)
