Moskva parklarında S-300 və S-400 kompleksləri yerləşdirilir - FOTOLAR
Ölkə.az “The Insider”ə istinadən xəbər verir ki, bunu OSINT-in analitiki Mark Krutov peyk görüntülərinə əsasən bildirib.
O qeyd edib ki, Rusiyanın Ukraynaya hücumunun başlanğıcından bəri Moskvada hər biri təxminən 4,5 hektar olan ən azı üç oxşar yer yaradılıb və burada S-300 və S-400 zenit-raket kompleksləri yerləşdirilib.
“Sentinel-2” şəkillərində Pavlova küçəsindəki “Medik” stadionunun yaxınlığında təmizlənmiş ərazi göstərilir. Analitik qeyd edib ki, bu ərazi Moskvanın qərbindəki ən yüksək nöqtələrdən birində, Moskva Dairəvi Yolunun içərisində yerləşir. Ərazi kruiz və ballistik raketləri ələ keçirmək üçün nəzərdə tutulmuş S-400-ün yerləşdirilməsi üçün hazırlana bilər.
M.Krutov qeyd edib ki, hazırlanmış zona, hakimiyyət orqanları tərəfindən əvvəllər Moskvanın digər yerlərində yaradılan zonalarla demək olar eynidir.
“Azadlıq” radiosu xəbər verir ki, peyk görüntülərinə və Yandex panoramalarına görə, 2023-cü ilin yanvar ayında Moskvanın şimalındakı Timiryazev Kənd Təsərrüfatı Akademiyasının keçmiş təcrübə sahələrində S-400 raket sistemləri quraşdırılıb. Sokolniki parkı ilə Losiny Ostrov parkı arasında, eləcə də İzmailovo Meşə Parkında digər bu cür yerlər də yaradılıb.
Rusiya Müdafiə Nazirliyi və Moskva hökuməti Kuntsevo meşəsindəki təmizlənmiş ərazinin yerində tikilən konkret obyekt və ya hava hücumundan müdafiə sistemlərinin orada yerləşdirilib-yerləşdirilməyəcəyi barədə heç bir şərh verməyib.
Mürtəza
