Belçika “Taliban”çılara viza və 24 saat vaxt verdi
Ölkə.az xəbər verir ki, “Taliban”çıların Brüsselə dəvəti Avropada ciddi rezonans doğurub.
Buna səbəb isə heç bir Aİ ölkəsinin “Taliban”ı Əfqanıstanın legitim hökuməti kimi tanımamasıdır.
Təhlükəsizlik yoxlamalarından sonra “Taliban”ın nümayəndə heyətinə məhdud regional etibarlılıq vizaları verilib. Bu viza ilə Belçikada yalnız 24 saat qalmaq mümkündür. Əfqanıstan nümayəndələrinə Şengen zonasındakı digər ölkələrə giriş qadağan edilib.
Məsələ ilə bağlı mövqeyini açıqlayan Belçikanın xarici işlər naziri Maksim Prevot bildirib ki, Brüssel “Taliban”ı tanımır, lakin Aİ-nin viza vermək tələblərini yerinə yetiriblər.
“Ev sahibi dövlətimizin siyasəti çərçivəsində görüşün mümkün olması tanınma, legitimlik və Belçika hökumətindən dəvət demək deyil”, - o vurğualyıb.
Belçika və Aİ rəsmi olaraq “Taliban” hökumətini tanımadığı üçün görüş hər iki tərəfə məxsus rəsmi binalarda və ya obyektlərdə keçirilməyəcək.
Avropa Komissiyasının sözçüsü Markus Lammert deyib ki, görüşün keçirilməsi 27 Aİ ölkəsinin əksəriyyətinin təzyiqinə cavabdır.
M.Lammert bildirib ki, üzv dövlətlər ciddi cinayətlər törətmiş və təhlükəsizlik üçün təhdid yarada biləcək şəxsləri geri qaytarmağın yollarını axtarırlar.
Mürtəza
