Türkiyədə 17 il öncə bu gün 17 min adam ölmüşdü

Bu gün Türkiyədə 17 il əvvəl 17 avqustda baş vermiş dəhşətli zəlzələnin qurbanlarının xatirəsi yad edilir.

Düz 17 il öncə gecə saat 03:02-də 7,4 bal gücündə və cəmi 45 saniyə davam edən, "əsrin fəlakəti" kimi tarixə düşən Mərmərə zəlzələsi Kocaeli, Sakarya, İstanbul, Düzcə və Yalovada, ətraf qəsəbə və rayonlarda böyük tələfatlara səbəb olmuşdu.

Bu dəhşətli zəlzələ nəticəsində 17480 nəfər ölmüş, 43953 nəfər yaralanmışdı. 200 min nəfər evsiz qalmış, 66441 tikili, 10901 iş yeri yerlə yeksan olmuşdu. Faciə nəticəsində 16 milyona yaxın insana müxtəlif dərəcəli ziyan dəyib.

Statistikaya görə, Mərmərə zəlzələsi dünyada 1900-2009-cu illər ərzində baş vermiş zəlzələlər arasında 20 milyon dollardan çox iqtisadi ziyan vuran 6 böyük zəlzələdən biridir.

Yalova şəhərində 1999-ci il 17 avqust zəlzələsi qubanlarının xatirəsinə ucaldılan "Zəlzələ" abidəsi ətrafı bu gün insanlarla dolub daşdı. Zəlzələ qurbanlarının ruhuna dualar oxundu. Ziyarətçilər zəlzələ görüntülərini əks etdirən fotosərgini hüznlə seyr etdilər.

Kocaelinin Gölcük rayonunda xatirə tədbiri təşkil olunub. Şəhər valisi baş verən fəalkətin bir daha yaşanmaması üçün baş verənlərdən dərs götürməyin vacibliyini vurğulayıb. Bütün fəlakət qurbanlarına rəhmət diləyib, ailələrinə dərin hüznlə başsağlığı verib.

İlhamə
Ölkə.Az