Rusiyada girov saxlanıldığını iddia edən azərbaycanlı: “Pasportumu alıblar, məndən 10 min istəyirlər”

Yevlax rayonunun Aran qəsəbə sakini, 34 yaşlı Abbasov Elburus Vəli oğlu Rusiyada çətin vəziyyətdə qaldığını iddia edir.

"Ölkə.az" xəbər verir ki, o, Musavat.com-a müraciət edərək Azərbaycana qayıtmaq istədiyini, lakin xarici pasportunun əlindən alındığını və ölkəyə dönə bilmədiyini bildirib.

Onun sözlərinə görə, təxminən bir ay əvvəl işləmək məqsədilə qonşusu Səbuhi Əsgərovla birlikdə Rusiyanın Sankt-Peterburq şəhəri yaxınlığındakı Kirov qəsəbəsinə yollanıb.

Elburus Abbasov deyir ki, onlara Rusiyada yaşayan Rizvan Abbasov adlı şəxsin istixanalarında işləyəcəkləri və yaxşı qazanc əldə edəcəkləri vəd olunub.

“Qonşum Səbuhi Əsgərov dedi ki, Rusiyada Rizvan Abbasov adlı şəxs var, onun istixanaları var və işçi axtarır. Mən də işsiz olduğum üçün razılaşdım. Mayın 23-də yola düşdük və onun dediyi ünvana çatdıq. Orada Rizvan xarici pasportlarımızı aldı və bildirdi ki, guya qeydiyyata saldırmaq üçün lazımdır.

Gedəndən sonra məlum oldu ki, ortada hazır istixana yoxdur. Bizə dedilər ki, sıfırdan istixana qurmalıyıq. O vaxtdan işləyirik, amma nə maaş verilir, nə də oranı tərk etməyə icazə verilir. Pasportumuzu geri istəyəndə isə müxtəlif bəhanələr gətirirlər”.

Zərərçəkən iddia edir ki, hazırda pasportu qaytarılmır və Azərbaycana dönmək üçün ondan pul tələb olunur.

“Mən xarici pasportumu və yol pulumu istəyirəm ki, Azərbaycana qayıdım. Amma Rizvan deyir ki, ya 10 min manat verməlisən, ya da yerinə işləyəcək başqa adam tapmalısan. Bəzən də deyir ki, bir neçə günə pasportu qaytaracaq, amma sözünü tutmur”.

Elburus Abbasov bildirir ki, dil bilmədiyi və ərazini tanımadığı üçün yerli hüquq-mühafizə orqanlarına da müraciət etməkdə çətinlik çəkir.

“Rus dilini bilmirəm, heç kimi tanımıram. Hazırda Rizvanın evində qalıram. Ailəm hər gün zəng edib nə vaxt qayıdacağımı soruşur. Bir müddət interneti də kəsmişdilər, çox çətinliklə əlaqə yarada bildim. Azərbaycan dövlətindən və Rusiyadakı səfirliyimizdən xahiş edirəm ki, mənim ölkəyə qayıtmağıma kömək etsinlər”.

Qeyd edək ki, yazıda səsləndirilən iddialar müraciət edən şəxsin ifadələrinə əsaslanır. Qarşı tərəfin mövqeyini dərc etməyə hazırıq