Bakıda bina sakinləri evlərini kütləvi satır?

Bakıda bina sakinləri evlərini kütləvi satır? - AÇIQLAMA

Türkiyədəki zəlzələdən sonra Azərbaycanda da yaşayış binalarının təhlükəsizlik məsələsi aktuallığını qoruyur. Binaların təbii fəlakət qarşısında nə qədər dözümlü olması müzakirəsi fonunda insanların həyət evlərinə köçməsi və ya bu barədə düşünməsi mövzusu gündəmə gəlib. Lakin bunun nə qədər real, hansı miqyasda olduğu məlum deyil. Artıq saytların birində binada yaşayan sakinin zəlzələdən qorxduğu mənzilini satmaq istəməsi ilə bağlı bir elan dərc olunub. Yayılan şayiələrə görə isə bu, kütləvi hal almağa başlayır.

Məsələ ilə bağlı əmlak sahəsi üzrə ekspert, Emlak.az saytının mütəxəssisi Bəhruz Həsənov “Ölkə.Az”a açıqlamasında bildirdi ki, belə hallar çox deyil:

“Ola bilər ki, bəziləri bunu şou xarakterli edir. Çünki həmin elanları bəzən bir müddət sonra tapmaq olmur. Doğrudur, insanlarda müəyyən təşvişlər yarana bilir, lakin bu, kütləvi deyil. Belə düşünən yüzlərlə, minlərlə insan yoxdur”.

B. Həsənovun sözlərinə görə, əgər zəlzələ bizim ölkəmizdə baş versəydi, bu tendensiya daha geniş hal alardı: “Reallıqda isə belə elanlar çox azdır. Artıq yeni tendensiya evini satmaq istəyən insanların elanlarına mənzilin neçə ballıq zəlzələyə davamlı olması ilə bağlı məlumat yerləşdirməsidir. Belə ki, bəzi sakinlər mənzillərinin yerləşdiyi binanın 8-12 ballıq zəlzələyə davamlı olması ilə bağlı əlavə qeydlər edirlər”.

“Düzdür, həssas olan insanlar ölkəmizdə də belə bir halın baş verə biləcəyindən narahat olaraq bina evini həyət evinə dəyişmək qərarına gəlir. Bu, bir binada maksimum 1-2 nəfər tərəfindən düşünülə bilər. Həmçinin Türkiyədən fərqli olaraq Azərbaycanda tikintilər daha keyfiyyətli aparılır. Lakin burada zəlzələnin baş vermə şərtlərini də nəzərə almaq lazımdır”, - deyə ekspert əlavə edib.