Əsəbiləşməyin, onlara təşəkkür edəcəksiniz - Samir Mirzə

Arzusunda olduğum bir iş yeri vardı. Tezliklə ora keçəcəyimdən əmin idim, amma tələsirdim. Vaxt, vədə yetişdi. Həmin müəssisədə hörmətlə qarşılandım və işə başlamışdım ki, paralel olaraq yeni iş təklifi aldım. Lakin yeni işimi, arzuma çatdığımı əsas gətirərək üzrxahlıq etdim, təklifi geri çevirdim. Yeni iş təklifi isə qeyri-müəyyən idi, ətraflı heç bir məlumat verilməmişdi. Qısa müddət sonra anlaşılmazlıq oldu və həmin iş yerindən ayrılmaq qərarına gəldim. İş təklif edən şəxslə çəkinərək əlaqə saxladım, çox şükür ki, gecikməmişdim, anlaşa bildik.

Dünən Təşəkkür Günü imiş, işin bu tərəfi haqda: qarşılaşdığım bütün hallara görə, bu işdə əli olanların hamısına təşəkkür edirəm ki, susqun şəkildə işdən ayrılmağıma, iş mühitində yeni mərhələyə başlağıma səbəb oldular. Qətiyyən soxmacalı niyyətlə demirəm, doğrudan da indiyə qədər hörmətlərini saxlayıram. Hadisənin digər tərəfi isə öz arzularımı təftiş etmək oldu. Çünki yanlış bir işin baş tutmasını diləmişəm, bu baxımdan yaşanan bütün anlara təşəkkür edirəm.

Bu proses fonunda “qapıdan çıxsan, geri dönmək yoxdur” deyən də həmin qapıdan uzun müddət sonra çıxıb arxamca gəldi. Yaşanan bütün hallara təşəkkür edirəm ki, lazımi məqamlarda qərarlarda qətiyyətli olmağı da öyrətdi. Həmin şəxsə qarşı zərrə qədər kinim yoxdur. Hətta onun üçün duaçıyam. İnanın ki, hikkədə fayda yoxdur. Bəlkə də, həmin an içimdən qəzəb, aqressiya hissləri keçib, amma belə bir hadisəni yaşadığıma görə Yaradana təşəkkür edirəm. Elə həmin şəxsə də təşəkkür edirəm.

İnsanıq, xəstələnirik, ziyarətimizə gəlib bizə mənəvi dəstək olurlar. Amma bir dəfə “qardaşunda bir arxivlər var e, gəl görəsən” zeyniyyətində olan, özünü haqq-ədalət carçısı kimi tanıdan və s. oxşar xüsusiyyətlərin onda olduğunu söyləyən şəxs xəstələndiyim zaman pis olub ziyatərimə gəlmişdi. Ertəsi gün evdən oğurluq etdiyini bildim, özünə də dedim, etiraf etdi sərxoşluğu ilə izah edərək üzrxahlıqda bulundu. Ona da təşəkkür edirəm, edirəm ki, belə insanların var olduğunu mənə əyani şəkildə sübut etdi. Onunla da illər sonra görüşdükdə adi münasibət göstərirəm. Amma tədbirliyəm, tədbirli olmağımı mənə öyrətdiyi üçün təşəkkür edirəm.

İnsan o qədər onu yandırıb qovuran hallar yaşayır ki, bunu yaşadanlara sonda təşəkkür edirsən. Təbii ki, həmin vaxtlar təmkinini qoruyub saxlayacaqsansa. Özümüzdən çıxıb prosesi qəlizləşdirsək, hamıya düşmən kəsiləcəyik, çünki insan hadisələr zamanı təqsirkar, “günah keçisi” axtarır ki, məsuliyyəti üzərindən atsın. Özünü mühakimə etmək haqqında ya düşünmürük, ya da az düşünürük. Məsələn, bizə öyrədilib ki, mərhəmətli olmaq lazımdır. Bəli, razıyam ki, mərhəmətli olmaq ən böyük xüsusiyyətlərdən biridir. Amma qarşı tərəf dəfələrlə eyni səhvləri təkrarladıqda, bu, artıq özünə qarşı mərhəmətli davranmamaq sayılır. Çünki özün həlak olursan, qarşı tərəf zərər verməkdən yorulmur, bilir ki, səndən ziyan görməyəcək, buna görə də cürətlənir və bu, çox təəssüf ki, namərd adamlara xas xüsusiyyətdir. Onları da bağışlamaq olar, amma bir şərtlə: həmin adamla salam-sağ ol səviyyəsində münasibət və yalnız zəruri hallarda ünsiyyət.

Təşəkkür edirəm, o insanlara ki davamlı nəyisə izah etməyin əbəs olduğunu öyrətdi. Bir saata yaxın nəyisə izah etmişəm, razılaşıb və sonda haqlı olduğumu deyib, yenə dəfələrlə eyni şeyləri təkrar edən o insanlara təşəkkür edirəm. Davamlı hamıya qarşı yaxşı niyyətini ortaya qoymağın səhv olduğunu öyrədənlərə təşəkkür edirəm. Yəqin ki, mənə də təşəkkür edənlər az deyil…

Ümumiyyətlə, insan bağışlayanda, qarşı tərəfə haqqını halal edəndə mənəvi rahatlıq tapır, o zalım zalımlığından qalmırsa, ictimai mövzu deyilsə, cəza vermək vacib deyilsə, həmin adam üçün dua etməklə, ona elə ürəyində davamlı təşəkkür etməklə sakitləşmək və nəticə çıxarıb tədbirli olmaq insana çox ciddi fayda verir.

Ona görə də çox sonralar, az sonralar və sonralar başa düşürəm ki, öz etdiyimi, mənə edilənləri yalnız və yalnız dərk etmək, tədbirli olmaq və ən əsası onlara təşəkkür etmək lazım imiş.

Yazını pozitiv tonlarda bitirib sizi təşəkkürə kökləmək istədim, bu hadisələrin içində, əlbəttə ki, neqativ hallar yaşanır, amma… Təşəkkür edirəm, o adamlara, ən başlıcası isə Yaradana. Onu nə qədər incitmişik. Gec, amma güc olan işlərdən doğan səbrə, hadisələrdən çıxardığın dərslərə görə Yaradana təşəkkür edirəm.

Samir Mirzə