Pablo Eskobar

Pablo Emilo Eskobar Qavriya 1949-cu ilin 1 dekabr tarixində dünyaya gəlib. Pablo Eskobar- terrorçu, kolumbiyalı narkobaron, narkotika alverindən milyardlarla pul qazanan şəxs, 20-ci əsrin ən qəddar cinayətkarlarından biri.

O, nəinki Kolumbiyanın, eyni zamanda dünyanın ən məşhur narkobaronudur və dünya tarixində ən tanınmış cinayətkarlardan sayılır. 1989-cu ildə “Forbes” jurnalı Pablonun adını “dünyanın ən varlı adamları” siyahısında 7-ci pilləyə daxil edir. Bu zaman Eskobarın 25 milyard dollarlıq şəxsi sərvəti var idi.

Ekspertlərin fikrinə görə, Pablo 10 min insanın ölümündə günahkardır. Bununla belə, Eskobar şərəf kodeksi olan cinayətkar idi. Məsələn, Medellində onun vəsaiti hesabına uşaqlar üçün çoxsaylı futbol meydançaları, kasıblar üçün böyük bir məhəllə salınmışdı.

Ölkə.Az dünyanın ən məşhur narkobaronu, mafiya başçısı Pablo Eskobarın həyatını təqdim edir.

Uşaqlığı

Pablo 1949-cu ildə Medellindən 40 km-lik məsafədə yerləşən Antokiya şəhərində anadan olub. O, adi kəndli ailəsinin üçüncü övladı idi. Kiçik yaşlarında Pablo əfsanəvi kolumbiyalı “banditos” (quldurlar-red) haqqında nağıllar dinləməyi çox xoşlayardı. Bu quldurlar varlıları soyur, kasıblara kömək edirdi. Uşaqlıq illərində o, böyüyəndə mütləq “banditos” olmaq qərarına gəlir. Kimin ağlına gələrdi ki, 15-20 ildən sonra kiçik oğlanın romantik arzuları milli dəhşətə çevriləcək?!

“Banditos” karyerasının başlanğıcı

Pablonun 12 yaşı olanda ailəsi ilə birlikdə Medellin ətrafındakı Enviqado şəhərciyinə köçür. Yeniyetmə tezliklə marixuanaya qurşanır və 16 yaşı olanda onu məktəbdən qovurlar. Məktəbdən qovulan gündən Pablo yerli qəbiristanlıqdan sinədaşlarını oğurlayaraq satmağa başlayır. Tezliklə Eskobrın ağlına “dahiyanə” ideya gəlir: o, avtomobili qaçırılan şəxslərə “müdafiə” təklif edir. Onun xidmətlərindən istifadə edərək dəstəyə haqq ödəməkdən imtina edənlər qısa müddətə maşınsız qalırdılar. Bu reket fəaliyyəti idi.

Sonradan Pablo oğurluq və reketçilikdən daha ağır cinayətə-insan oğurluğu və qətlinə keçir. 21 yaşı olanda Pablonun çoxsaylı silahdaşı var idi. Onun qruplaşması isə zaman keçdikcə daha qəddar, amansız və məkrli olurdu.

El-Patron

1971-ci ildə Pablo Eskobarın dəstəsi imkanlı torpaq sahibi və sənayeçi Dieqo Eçevarionu oğurlayır. Dieqo uzun müddətli işgəncələrdən sonra qətlə yetirilir.

Bu hadisə Eçevarioya nifrət edən yerli kasıb kəndlilər tərəfindən coşqu ilə qarşılanır. Medellin kasıbları Dieqo Eçevarionun ölümünü bayram edir, təntənəli surətdə qeyd edirlər. Bu hadisənin səbəbkarı Eskobara hörmət rəmzi olaraq “El-Doktor” ünvanı ilə müraciət etməyə başlayırlar. Tezliklə Eskobar çililərin kokain istehsalını ələ keçirir, bu sahəni fantastik gəlir gətirən biznesə çevirir. Nəticədə “El-Doktor” çox ciddi səviyyədə varlanır, Medellinin ən nüfuzlu cinayətkarlarından birinə çevrilir. Onun reytinqi şəhərdə günbəgün artırdı. Məhz bu dövrdə gənc “El-Doktor” “El-Patron”a çevrildi və ölümünə qədər bu adı daşıdı.

Narkobaron

1970-ci illərin amerikalı hippilərinin yeni nəsli artıq marixuana ilə kifayətlənə bilmirdi. Yeni və daha güclü narkotik maddə-kokain tələb olunurdu. Pablo bu sahə üzrə kriminal biznesini qurmağa başlayır. O, kokaini istehsalçılardan alır, ABŞ-a ötürmək üçün qaçaqmalçılara satırdı. “Əyləc” sisteminin (narkotik maddə alverinə qarşı) olmaması, Pablonun həddən ziyadə qəddarlığı və daim adam öldürməyə hazır olması onun rəqabətdən kənar qalmasına səbəb olur. Eskobar hansısa gəlirli kriminal iş barədə məlumat əldə edəndə, güc vasitəsilə bu işi ələ keçirirdi. Onun yoluna çıxan, fəaliyyətinə təhlükə törədən istənilən adam səssiz-səmirsiz yoxa çıxırdı.

Tezliklə ölkənin bütün kokain biznesi onun əlinə keçir. Heç bir narkotika alverçisi onun icazəsi olmadan ölkə sərhədlərindən kənara mal çıxara bilməzdi. Pablo hər kokain ticarətindən 35 % vergi alır və çatdırılmanı təmin edirdi. Eskobarın narkotika karyerası çox uğurla davam edirdi. “El Patron” demək olar ki, pul içində üzürdü və qanunvericiliyi heç vecinə də almırdı.

1976-cı ildə Pablo narkotik maddə ticarətinə görə saxlanılır. Bir neçə il sonra onu həbs edən polis zabiti, onun həbsinə order imzalayan hakim Eskobarın əmri ilə qətlə yetirilir.

Şəxsi həyatı-Eskobarın qadınları

1974-cü ildə Eskobarın 24 yaşı var idi və o, 13 yaşlı Mariya Viktoriya Eneo Viexo ilə görüşməyə başlayır. Qızın valideynləri onlara mane olmaq istəyəndə cütlük Palmiraya qaçır. 1976-cı ilin mart ayında cütlük ailə həyatı qurur. Tezliklə hələ 15 yaşı tamam olmayan Mariya Xuan Pablonu dünyaya gətirir. 3,5 il sonra isə Eskobarın sevimli qızı Manuela anadan olur.

Eskobarın həyatı boyu həddən artıq məşuqələri olub. “El Patron” pedofilliyi ilə ad qazanmışdı. Narkobaron əsasən yetkinlik yaşına çatmayan bakirə qız uşaqlarına üstünlük verirdi. Pablonun 400 məşuqəsi olduğu barədə dəqiq fakt var. Bu qadınlar üçün kiçik, qapalı şəhər də inşa edilmişdi. Məşuqələr arasında aktrisa, gözəllik müsabiqəsi qalibləri, fotomodellər var idi. Onların hər biri üçün ayrıca kotec inşa edilmişdi. Həyətində hovuzu, dincəlmək üçün xüsusi talvarı, arxitekturası və dizaynı unikal olan mülklər kiçik bir şəhərə bənzəyirdi.

Uğurlu jurnalist və Kolumbiya televiziyasının tanınmış simalarından olan Virxiniya Valyexo da Eskobarın məşuqələrindən biri idi. Cütlüyün çox ciddi münasibətləri var idi. Valyexo ilə Eskobarın eşq macərası 5 il davam edir.

Ərinin bütün hoqqalarına baxmayaraq Eneo Viexo Pablonu bütün işlərdə dəstəkləyir, son günə qədər onun yanında olur. Sonradan Pablonun rəqibi sayılan Kali narko kartelinin liderləri etiraf edirdilər ki, arvadlarını Eskobarla Eneonun telefon danışıqlarını dinləməyə məcbur ediblər. Çünki bu danışıqları dinləyərək qadınlar ərlərini necə dəstəkləmək lazım olduğunu anlamalı idilər.

Kokain imperiyasının rəhbəri

1977-ci ilin yay aylarında Eskobar 3 nəhəng narkotika alverçisi ilə ittifaq yaradaraq qüdrətli maliyyə-kokain imperiyasını qurur. Bu imperiya Medellin kokain karteli adlanırdı və dünyanın kokain dövriyyəsinin 80 %-nə nəzarət edirdi.

Kartelin yayım şəbəkəsi, çatdırılma şəbəkəsi, cəngəlliklərdə gizlədilmiş gizli laboratoriyaları, təyyarələri və ən müasir sualtı qayıqları var idi. “El Patron” Medellin kokain kartelinin lideri və dünya kokain sənayesinin ən nüfuzlu şəxsinə çevrilir. Eskobar polis əməkdaşlarını, hakimləri, siyasi xadimləri pula boğaraq ələ alırdı. Əgər rüşvət işə keçmirdisə, başqa üsula, yəni şantaja əl atırdılar.

Kolumbiyalı Robin Qud

Kartel ucuz evlər tikərək kasıblara, yoxsullara paylayırdı. Xalq “El Patron”u Milli Konqresin üzvü seçir. Eskobar kasıblara əl tutmaqla yanaşı özünü də unutmurdu. Onun 500 min hektar torpağı, 34 mülkü, qarajlarında 40 ədəd bahalı avtomobili var idi.

Narko baronun əsas mülkündə 20 süni göl, 6 hovuz və kiçik hava limanı var idi. Görünür, Eskobar bu qədər pulu hara xərcləyəcəyini bilmirdi. Pablonun “Neapol” adlandırdığı mülkü 20 min hektar ərazidə yerləşirdi və burada onun əmri ilə Cənubi Amerikanın ən böyük zooparkı salınmışdı. Zooparka dünyanın hər yerindən ekzotik heyvanlar, 120 antilop, 30 öküz, 6 begemot, 3 fil və 2 kərgədan gətirilmişdi. Mülk narko baronun vəsiyyətinə əsasən, ölümündən sonra evsiz ailələrə verilir.

Pablo nadir hallarda kokaindən istifadə edirdi. Onun narkomanlardan zəhləsi gedir, milyonlarla alıcısı onun nəzərində insan deyildi. Eskobar Medellində böyük tikintiyə başlayır. Yollar salınır, stadionlar tikilir, kasıblar üçün pulsuz evlər inşa edilirdi. Yerli xalq onu “Barrio Pablo Eskobar” adlandırırdı. Narko baron özünü kolumbiyalı Robin Qud hesab edir, kasıbların vəziyyətinə dözmədiyi üçün xeyriyyə fəaliyyəti ilə məşğul olduğunu deyirdi.

Siyasi karyera

Eskobar biznesini leqallaşdırmaq barədə yollar axtarırdı. 1982-ci ildə Pablo Kolumbiya Konqresinə namizədliyini irəli sürür. 32 yaşlı Eskobar Parlamentin üzvü seçilir. Palataya seçilmiş narkobaron insan hüquqları barədə seminarlara rəhbərlik etməyə başlayır. Növbəti illərdə onun hədəfi prezident kürsüsü idi. Amma Ədliyyə naziri Rodriqo Lara Boniya seçki yarışına kokain satışından gələn pula qarşı kütləvi kampaniyaya başladı. Nazirin səyi nəticəsində 1984-cü ildə Eskobarı Parlamentdən xaric edirlər.

Qisas yubanmadan oldu-1984-cü ilin 30 aprel tarixində Boqotanın mərkəzi küçələrinin birində nazirin avtomobili avtomat silahlardan gülləbaran edilir. Açılan güllələr Rodriqo Laranın başını və bədənini dəlik-deşik edir.

Kolumbiyada ilk dəfə quldurlar yüksək çinli dövlət məmurunu qətlə yetirirlər. Bununla da narkotika mafiyasının terroru başlayır. Dövlət isə bu terrora total müharibə ilə cavab verir.

Terrorizm

Eskobar “Los Eskstraditables” adlı terrorçu qruplaşma yaradır. Bu qruplaşmaya daxil olan quldurlar narkotika ticarətinə qarşı çıxan dövlət məmurları və polis əməkdaşlarına qarşı fəaliyyət göstərirdilər.

Nazirin qətlindən sonra narkobaronun həbs edilməsi barədə order çıxarılır və Eskobar gizlənmək məcburiyyətində qalır.

Eskobar sınmadığın

ı nümayiş etdirmək üçün böyük partizan qrupu yaradır. Bu qrup pulemyot, qumbara və raket qurğuları ilə silahlandırılmışdı və müxtəlif diversiyalar həyata keçirmək üçün nəzərdə tutulmuşdu.

Paytaxtın mərkəzində qəflətən peyda olan diversantlar yüzlərlə insanın olduğu Ədalət sarayını ələ keçirirlər. Partizanlar dayanmadan atəş açaraq narkotika mafiyası mənsublarına aid bütün sənədləri məhv edirlər. Boqotaya ordu və polis qüvvələri cəlb edilir. Tank və hərbi vertolyotların dəstəyi ilə keçirilən hücum əməliyyatında Ədalət sarayı geri qaytarılsa da, 100 nəfər həlak olur.

Bu müddət ərzində hökumət qüvvələri narko kartelə hücum edirdilər. 1986-cı ildə narko kartelin başçılarından biri, yəni Xorxe Luisa Oçoanın axtarışları üçün əməliyyat başlayır. Xorxe Amerika səfiri Tembsin qətli üçün 4 milyon dollar mükafat vəd etmişdi. 10 gün ərzində ölkədə 2.5 min adam həbs edilir, 2 ton kokain, 10 ton kokain kremi, 48 ton koki yarpağı, 11 təyyarə, 200 avtomat silah, 30 min güllə, 11 ton aseton, 100 ton müxtəlif kimyəvi maddə, min dinamit şaşka müsadirə edilir.

1987-ci ildə ABŞ məhkəməsi Medellin kartelinin liderlərindən biri, Karlos Lederunu ömürlük həbsə və 135 illiyinə azadlıqdan məhrum etmə cəzasına layiq görür.

Eskobar gizləndiyi halda, ölkədə qlobal terror yaradır. Onun məqsədi isə hamıya ölkənin əsl sahibinin kim olduğunu göstərmək idi. 2 il ərzində 1000 nəfər quldurların qurbanına çevrilir. Bu qurbanlar arasında jurnalistlər, hakimlər, narkomafiya əleyhinə çıxış edənlər və 600 polis əməkdaşı var idi. Narkobaronun əmri ilə 107 sərnişini olan təyyarə partladılır. Eskobarın hədəfi Kolumbiyanın gələcək prezidenti Sezar Qaviriya idi. Sezar bu reyslə uçmalı olsa da, son anda uçuşdan imtina edir. “El-Patron”un əmri ilə 1989-cu ilin 6 dekabr tarixində məxfi polis idarəsinin rəisi Migel Markesə sui-qəsd təşkil edilir. Bomba hücumu zamanı 62 nəfər həlak olur, 100-dən çox insan ağır yaralanır.

Kolumbiya narkomafiyasına qarşı elan edilmiş müharibə

Kolumbiya narkomafiyasına qarşı müharibəyə ABŞ hökuməti də qoşulur. Amerika narkobaronları ABŞ-dakı həbsxanalara göndərməyi təklif edir. Amerikalıların maliyyə yardımı nəticəsində Kolumbiya hüquq mühafizə orqanları kokain kartelinə qarşı əks-hücum təşkil edə bilir. Keçirilən bir əməliyyat sayəsində Pablo Eskobarın 989 ev və ferması, 367 təyyarəsi, 710 avtomobili, 5 ton kokaini və 1279 ədəd silahı müsadirə edilir.

Cinayətkarlar hökumətin hər zərbəsinə əks-zərbə ilə cavab verir. Evlər yandırılır, siyasi məmurlar qətlə yetirilir, partiya mərkəzləri partladılır, nəşriyyat orqanları və banklar gülləbaran edilir. Məsələn, 1989-cu ilin sentyabr ayında “El Espektador” liberal qəzetinin mərkəzi binası partladılır. Noyabr ayında Boqotadan Kaliyə uçan təyyarə yandırılır. Milad Bayramı ərəfəsində isə paytaxtda polis idarəsinin baş qərargahı partladılır. Seçkilərdən əvvəl kokain kartelinin terroru artmağa başlayır. Hər gün qatillər tərəfindən onlarla insan qətlə yetirilir.

Pablo Eskobar ABŞ-ın ən çox axtarılan cinayətkarlarının siyahısında birinci yerdə idi. Seçmə xüsusi xidmət orqanı dəstələri Pablonun ovuna çıxırlar. Onların hədəfi Eskobarı tutmaq və məhv etmək idi.

Kolumbiya hökuməti tərəfindən “Xüsusi axtarış qrupu” yaradılır. Bu qrupa ən yaxşı xüsusi xidmət orqanı, ordu və prokuratura əməkdaşları cəlb edilir. Tezliklə “El Patrona” yaxın olan bir neçə nəfər həbs edilir.

Eskobarın quldur dəstəsinin üzvləri ölkənin bir neçə nüfuzlu şəxsini əsir götürür. Narkobaron ümid edirdi ki, oğurlanmış şəxslərin varlı qohumlarının təzyiqi ilə Kolumbiya dövləti ABŞ-la narkotika alverçilərinin ekstradisiya müqaviləsini ləğv edəcək. Onun planı baş tutur, ekstradisiya ləğv edilir. Amma hər tərəfdən mühasirəyə alınan Eskobar 1991-ci ilin 19 iyun tarixində təslim olur. Pablo Eskobar keçmiş günahlarının bağışlanacağı şərti ilə bir neçə cinayətini etiraf etməyə razılaşır.

Həbsxana

Pablonun cəzası da qeyri-adi idi. Dünyanın ən qəddar terrorçusu özünün inşa etdirdiyi “La Katerdal” həbsxanasında cəzasını çəkməyə məhkum edilir. Bu həbsxanada üzgüçülük hovuzu, diskoteka, cakuzi, sauna və futbol meydançası var idi. Dostları, yaxınları və qadınları “El Patrona” baş çəkir, ailəsi isə istədiyi vaxt Eskobarla görüşürdü. Eskobar özü istədiyi vaxt həbsxanaya girir-çıxır, Medellinin gecə klubları və restoranlarını gəzir, futbol yarışlarını izləyirdi.

Pablo narkotika biznesinə əvvəlki kimi rəhbərlik edirdi. Bir dəfə partnyorlarının pul gizlətdiyini eşidən Eskobar “cinayətkarları” həbsxanaya gətizdirir, şəxsən işgəncə verir, qurbanlarının dizini deşir, dırnaqlarını çəkir və sonra öldürtdürür.

Qaçış

Bu faktlar ortaya çıxanda Kolumbiya prezidenti Sezar Qaviriya 22 iyul 1992-ci ildə kokain kralını əsl həbsxanaya köçürmək barədə əmr verir. Eskobar bu qərarı eşidəndə artıq kifayət qədər cəza çəkdiyini düşünərək həbsxanadan qaçır. Amma artıq gizlənmək üçün o qədər də çox məkanı yox idi. Kolumbiya və ABŞ hökumətləri Medellin kokain karteli və onun liderini bitirmək barədə qəti qərar qəbul etmişdilər. Tezliklə dostları Eskobarı tərk etməyə başladılar. Amma Pablo hələ də özünü ciddi fiqur sayırdı: əslində bu belə idi, narkobaronun kifayət qədər ciddi maliyyə imkanları var idi. Amma real hakimiyyəti əldən buraxmışdı. Pablo hökumətlə danışıqlar aparmaq istəsə də, nəticə əldə edə bilmədi. ABŞ və Kolumbiya qəti surətdə danışıqlardan imtina edir, onun ölüm fərmanını imzalamışdılar.

Kokain kralının başına 10 milyon dollar mükafat qoyulmuşdu. Azadlıqda olan “El Patron” hakimiyyətə qarşı qəddar terror aktı təşkil edir. 1993-cü ilin 30 yanvar tarixində paytaxtın izdihamlı küçələrindən birində partlayış törədilir. Nəticədə 20 insan həlak olur, 70 nəfər yaralanır.

Ov başlayır

Bu qəddar terror aktı ilə narkobaron bəlaya meydan oxuyur. “Los PEPES” adlı təşkilat Eskobarla mübarizəyə başlayır. Təşkilata Pablo Eskobarın əməllərindən əziyyət çəkən adamlar daxil edilmişdi.

Partlayışın ertəsi günü “Los PEPES” Pablonun evini yandırdı. Həlak olan şəxslərin qohumları təşkilatın əmri ilə narko kartelin üzvləri və qohumlarına qarşı ova çıxdılar. Qisasçılar da kokain mafiyası kimi qəddarlığa əl atır. Eskobar və onun kokain imperiyası ilə hər hansı bir əlaqəsi olan adamlar təqib edilir. Qısa müddət ərzində təşkilat narko kartelə ciddi zərbə vurur, Eskobarın bir çox yaxınları qətlə yetirilir. Narkobaronun ailəsi təqib edilir, mülklərinə od vurulurdu. 1993-cü ilin payız aylarında Medellin karteli dağılır. Pablonu daha çox ailəsi maraqlandırırdı. Çünki “Los PEPES” narkobaronun ailəsini ələ keçirsəydi, qəddarlıqla qətlə yetirərdi.

Pablo Eskobarın ölümü və kokain kralı dövrünün sonu

Gizlənən narkobaron 1 ildən çox arvadını və uşaqlarını görmür. İzləndiyini bilən Eskobar hətta telefon danışıqlarını da çox qısa edirdi. 1993-cü il 1 dekabr tarixində onun 44 yaşı tamam olur. Bu dəfə əsəbləri tab gətirməyən Pablo 2 dekabr tarixində ailəsinə zəng edir və elə bil ki, sağollaşmaq istəyir. Narkobaron sonuncu dəfə oğlu ilə danışır və bu telefon danışığının müddəti 5 dəqiqə olur. Təhlükəsizlik baxımından bu düzgün deyildi. Bu müddət ərzində Eskobarın Medellinin Los Olibos rayonunda olduğu təyin edilir. Tezliklə narkobaronun gizləndiyi ev xüsusi agentlər tərəfindən mühasirəyə alınır. İki nəfər qapını qıraraq içəri soxulur. Evdə Eskobar, onun yaxını, Limon ləqəbli Alvaro de Xesus Aqudelo var idi. Agentlər ilk olaraq Limonu və evin sahibəsi, Eskobarın doğma bibisini qətlə yetirirlər. Agentlərə atəş açan Eskobar dama çıxaraq qaçmağa çalışır. Snayper gülləsi Pablonun başından dəyir və narkobaron ölür. Bütün agentlər dama çıxaraq narko baronun cəsədi ilə şəkil çəkdirir.