400 bal toplayan Paşa seçəcəyi universiteti açıqladı - MÜSAHİBƏ

O, əslən Laçın rayonunun Çorman kəndindəndir. Ailəsi məcburi köçkün kimi Qəbələdə məskunlaşıb. Paşa 2009-cu ildə bu şəhərdə anadan olub.

Ölkə.az onunla müsahibəni təqdim edir:

- Paşa, ilk növbədə səni təbrik edirik. Belə bir nəticəni gözləyirdinmi?

-Təşəkkür edirəm. Birinci mərhələdə sürüşdürmədə səhvim olmuşdu. Yüksək bal toplayacağımı gözləyirdim. Amma 400 olacağını düşünmürdüm. Mənim üçün də çox xoş sürpriz oldu.

- İmtahana hazırlaşarkən repetitor yanına getmisən, yoxsa özün hazırlaşmısan?

- Repetitorların yanında hazırlaşmışam.

- Valideynlərin hansı peşənin sahibidir?

- Atam müəllimdir.

- Hansı fənni tədris edir?

- Mənim oxuduğum məktəbdə fiziki tərbiyə fənnini tədris edir.

- Səni atan da imtahanlara hazırlaşdırırdı? 

- Xeyr, əsasən repetitor müəllimlərin yanında hazırlaşmışam.

- Necə oldu ki, ikinci ixtisas qrupunu seçdin?

- Coğrafiyaya böyük marağım var. İkinci qrupu seçməyimin əsas səbəbi də məhz coğrafiyaya olan sevgimdir. 

- İndi yüksək bal toplamısan. Buna baxmayaraq, gələcəkdə coğrafiya sahəsində təhsil almağı düşünürsən?

- Xeyr. Mən maliyyə sahəsində təhsil almaq istəyirəm. 

- Hansı universitetdə təhsil almaq istəyirsən?

- Bakı Ali Neft Məktəbində.

- Hazırda oxuduğun məktəbdə əvvəldən təhsil almısan?

- Xeyr, mən bir neçə məktəb dəyişmişəm. Birinci sinifdən üçüncü sinfə qədər Qəbələ şəhər ümumi orta məktəbində oxumuşam. Dördüncü sinifdən doqquzuncu sinfə qədər Şuşa şəhər 24 nömrəli məktəbdə təhsil almışam. Daha sonra Kəlbəcər rayon 31 nömrəli məktəbdə oxumuşam. Sonuncu təhsil ilimi isə Laçın məktəbində başa vurmuşam.

- Nəticəni ilk kimdən eşitdin?

- Maraqlıdır ki, nəticəni özüm öyrənmədim. Həmin vaxt internetimiz yox idi. Xəbəri mənə atam verdi.

- Bu uğura görə ən böyük təşəkkürün kimlərədir?

- İlk növbədə valideynlərimə, sonra repetitor müəllimlərimə və məktəb müəllimlərimə təşəkkür edirəm.

- Sinifinizdə yüksək nəticə göstərən başqa şagird olubmu?

- Başqa uşaqlar yox. Bundan əvvəl bacım da orada təhsil alıb. Yüksək nəticə göstərib. O, 613 bal toplayaraq hüquq ixtisasına qəbul olub və hazırda Gömrük Akademiyasında təhsil alır.

- Laçına səfər etmək imkanın olubmu?

- Bəli. İşğaldan azad olunduqdan sonra 3-4 dəfə Laçına getmişəm. Ailəmlə birlikdə həmin səfərlərdə iştirak etmişəm.

- Hazırlıq dövründə telefondan və sosial şəbəkələrdən istifadə edirdinmi?

- Bəli, istifadə edirdim. Amma çalışırdım ki, dərslərlə şəxsi vaxtımı bir-birindən ayırım. Sosial şəbəkələrdən istifadə etsəm də, dərslərimə mane olmasına imkan vermirdim.

Həmidə İbrahimova