Hakim korpusunun gücləndirilməsi prioritetdir – Kərəm Mansurov
Azərbaycanda keyfiyyətli ədalət mühakiməsinin təmin olunması və vətəndaşların məhkəmə sisteminə inamının daha da artırılması məqsədilə hakim korpusunun peşəkar hüquqşünaslarla komplektləşdirilməsi əsas prioritetlərdən biri olaraq qalır.
"Ölkə.az" xəbər verir ki, bunu Məhkəmə-Hüquq Şurasının Aparat rəhbəri Kərəm Mansurov jurnalistlərə açıqlamasında bildirib. Onun sözlərinə görə, hazırda "Vakant hakim vəzifələrinə namizədlərin seçilməsi Qaydaları"na uyğun olaraq 337 hakimliyə namizədin iştirakı ilə növbəti test imtahanı keçirilir.
Kərəm Mansurov qeyd edib ki, imtahan beynəlxalq və yerli müşahidəçilərin, vətəndaş cəmiyyəti institutlarının, eləcə də media nümayəndələrinin iştirakı ilə tam şəffaf şəraitdə təşkil olunub.
"Namizədlər imtahanı başa vurduqdan dərhal sonra nəticələrini əldə edəcəklər. Test mərhələsində 60 və daha çox bal toplayan namizədlər müsabiqənin növbəti mərhələsi olan yazılı imtahana buraxılacaqlar", – deyə Aparat rəhbəri bildirib.
Kərəm Mansurov əlavə edib ki, hazırda 67 hakimliyə namizədlə keçirilən müsahibələr artıq yekunlaşıb. "Yaxın vaxtlarda müvəffəqiyyət qazanan namizədlərin nəticələri elan ediləcək. Həmin nəticələr və namizədlərin ixtisaslaşmaları ilə bağlı rəylər Məhkəmə-Hüquq Şurasına təqdim olunacaq", – o vurğulayıb.
Aparat rəhbərinin sözlərinə görə, hazırda Azərbaycanda 705 hakim fəaliyyət göstərir. Hakim korpusunda mövcud vakant yerlərin doldurulması məqsədilə hakimliyə namizədlərin seçilməsi prosesi fasiləsiz davam etdirilir. Kərəm Mansurov bildirib ki, 2023-cü ilin əvvəlindən indiyədək 254 yeni hakim vəzifəyə təyin olunub.
O, sonda hakim olmaq istəyən hüquqşünasları seçim prosesində daha fəal iştirak etməyə çağıraraq bildirib ki, Hakimlərin Seçki Komitəsi bu istiqamətdə namizədlərin iştirakını təşviq etməyə davam edir.
