Ruslan İzzətli Ərdoğana məktub göndərdi
D18 Hərəkatının başqanı Ruslan İzzətli şəxsi və təşkilatı adından fevralın 17-i Türkiyənin paytaxtı Ankara şəhərində törədilmiş qanlı terror hadisəsi ilə bağlı Türkiyə xalqına və Prezident Rəcəb Tayyib Ərdoğana başsağlığı məktubu göndərib.
Məktubda deyilir:
“Cənab prezident!
Qardaş Türkiyədə baş verən terror hadisəsi bizi çox kədərləndirdi. Terror nəticəsində həyatını itirən şəhidlərimizə Allahdan rəhmət, yaralılara isə şəfalar diləyirəm. Biz özümüz də terrordan əziyyət çəkən bir xalq olaraq harada baş verməsindən asılı olmayaraq terroru lənətləyir, bu vəhşiliyi hiddətlə qınayırıq.
Türkiyənin regionda güclənməsini istəməyən qüvvələr bu cür terrorlarla Türkiyənin gücünü əlindən alacaqlarını sanmasınlar. Əksinə, haqsız yerə tökülən qanlar, qəzəb Türkiyəni daha da gücləndirəcək. Türkiyə nəinki regionda, dünyada ən güclü dövlətlərdən biridir. Biz Azərbaycan xalqı olaraq da hər zaman Türkiyəmizin yanındayıq.
Cənab prezident!
Sizə, həlak olanların ailələrinə və yaxınlarına, qardaş Türkiyə xalqına öz adımdan və rəhbərlik etdiyim D18 Hərəkatı adından dərin hüznlə başsağlığı verir, yaralananlara və xəsarət alanlara Allahdan şəfa diləyirəm.
Ruslan İzzətli,
D18 Hərəkatının Başqanı"
