"Mitinqə əksəriyyət foto çəkdirməyə gəlir"

Deputat "Ölkə.Az"a açıqlamasında deyib ki, mitinqdə hər zaman olduğu kimi, bu dəfə də az insan iştirak edəcək:

"Ötən dəfə keçirilən aksiyalar da göstərir ki, müxalifətin mitinqinə gələnlərdən dəfələrlə çox adam ora maraq üçün gəlir. Yəni, bu gün istirahət günü olduğu üçün mitinq keçirilən stadionun ətrafında olan insanlar kimi, stadionun içərisində olan bir çox adamlar da ora tamaşa etmək üçün gedirlər. Mitinqə gələnlərin əksəriyyəti ya foto çəkdirmək, ya da tamaşa etmək üçün gəlirlər. Həmin insanları ora tamaşa edib vaxt keçirtmək marağı cəlb edir. Müxalifətin çağırışına qoşulub stdiona gedən adamların sayı 500-dən çox deyil. Yerdə qalan digər insanlar izləmək üçün ora gedirlər".  

A.Hüseynov qeyd edib ki, radikal və dağıdıcı müxalifət Azərbaycan xalqının və dövlətinin maraqlarına zidd mövqedə dayanır:

"Şübhəsiz ki, radikal müxalifət Azərbaycanın güclü dövlət olmasını və müstəqil siyasət yürütməsini istəməyən xarici dairələrin əlində oyuncağa çevrilib. Radikal müxalifətlə Azərbaycana qarşı olan mərkəzləri birləşdirən məqamlar var. Həmin məqamlardan biri də Azərbaycanı gözdən salmağa və qeyri-demokratik ölkə kimi göstərməyə çalışmaqdır".

Deputat əlavə edib ki, aprelin 11-də Azərbaycanda keçirilən prezident seçkiləri demokratikliyi, şəffaflığı və azad şəraiti ilə yaddaşlarda qalıb:
"Təsəvvür edin ki, bu cür şəffaf və demokratik seçkiləri belə ATƏT nümayəndələri şübhə altına almağa çalışır. Əslində bu ondan irəli gəlir ki, 11 aprel seçkilərinin nəticələri Azərbaycan xalqının iradəsi ilə yekunlaşıb. Dünyaya nümunə olacaq bu cür şəffaf və demokratik seçkilərdə hər hansı irad tutulması açıq şəkildə ağa qara deməkdir".

Vasif Həsənli
Ölkə.Az