25 il eyni istirahət mərkəzində dincəldi, varidatını otel işçisinə vəsiyyət etdi - İngilis turistdən miras sürprizi

"Ölkə.Az" xəbər verir ki, bir ingiltərəli turist ilk dəfə 1990-cı ildə getdiyi oteli o qədər sevib ki, sonrakı 25 il ərzində yalnız bu istirahət mərkəzində dincəlib.

2015-ci ildə vəfat edənə qədər Çarlz Kortni 52 dəfə bu otelə gəlib. Və yalnız bir otaqda - 401 nömrəli otaqda qalıb.

Bu tarixçənin daha maraqlı hissəsi, Çarlzın vəfatından sonra yaşanıb. Yaxınları onun vəsiyyətini açdıqda, məlum olub ki, Çarlz varidatının böyük hissəsini qohumlarına deyil, otel işçilərinə vəsiyyət edib. 

Pulun böyük hissəsinin isə konkret bir nəfərə - oteldə 1990-cı ildən qonaqların yükünü daşıyan kiçik xidmətçi Daşqın Daştana çatmasını istəyib. 

Daşqın danışır ki, Çarlzla dostluğu 90-cı illərdən başlayıb. O dərəcədə dost olublar ki, ingiltərəli pulunu ona etibar edir, daim ailəsi, uşaqlarının təhsili ilə maraqlanırdı.

Çarlzın qohumları əvvəl vəsiyyətə əməl etmək istəməyiblər, illərlə mübahisə ediblər, amma ötən ilin avqust ayında kişinin qohumu pulu Türkiyəyə gətirib və otel işçilərinə təqdim edib. 
İndi ingiltərəli qonağın qaldığı 401 saylı otağa Çarlzın otağı adını veriblər.