Qətli törədən bələdiyyə sədrinin yaxını imiş?

Abşeron rayon Saray bələdiyyəsinin sədri Vəsilə Əbilhəsənovanın öldürülməsi ilə bağlı bəzi təfərrüatlar məlum olub. Belə ki, aprel ayının 29-da moderator.az saytında şikayətçi Fikrət Məmmədovun məktubu əsasında hazırlanan yazıda qətlin törədilməsində şübhəli bilinən Hüseynov Fədainin adı çəkilir. Yazının həmin hissəsini olduğu kimi təqdim edirik:

"20 aprel 2015-ci ildə DİN-in Baş Mütəşəkkil Cinayətkarlıqla Mübarizə İdarəsinə şikayət etdiyimizə görə 25 aprel tarixində Xırdalan şəhərində həmin qoçu dəstəsinin üzvləri Vüqar, Fədai və Nuru qardaşlarının başçılığı altında 8-9 nəfərlik dəstənin hücumuna məruz qaldıq. Onlar qəflətən mənim və yanımda olan bacımoğlunun, qardaşımoğlunun üzərinə hücum edərək bizi hədələdilər, üstümüzə bıçaq çəkərək ölümlə hədələdilər. Tələbləri də bu olub ki, adıçəkilən quruma etdiyimiz şikayəti geri götürməsək bizi ailəlikcə məhv edəcəklər. Xoşbəxtlikdən yaxınlıqda olan insanların köməkliyi ilə həmin quldur dəstəsinin əlindən qaçıb canımızı qurtara bildik".

Qeyd edək ki, Abşeron Rayon Polis İdarəsinin əməkdaşlarının keçirdiyi əməliyyat nəticəsində hadisəni törətməkdə şübhəli bilinən 1980-cı il təvəllüdlü Hüseynov Fədai Güloğlan oğlu tutulub. O, ifadəsi zamanı cinayətı törətdiyini etiraf edib.

Xatırladaq ki, hadisə bu gecə Abşeron rayonu Saray qəsəbəsində baş verib. Saray bələdiyyəsinin sədri Əbilhəsənovanın başı kəsilib, həyat yoldaşı isə güllə ilə ürəyindən vurulub.

İntiqam VALEHOĞLU
Ölkə.az