8 yaşında butulkada dənizə atdığı müraciətə 25 il sonra cavab aldı

“Ölkə.Az” “The Mirror”a istinadən bildirir ki, 1996-cı ildə Şotlandiyanın Piterhed şəhərində, Aberdinşirdə yaşayan səkkiz yaşlı Koana Baken mesaj yazaraq, onu butulkanın içərisinə qoyub və evinin yaxınlığında dənizə atıb. Qız məktubda məktəb layihəsi çərçivəsində öz düşüncələrini yazıb. 8 yaşlı qız məktubunda hobbilərindən, həmçinin oğlanlara olan nifrətindən bəhs edib.

“Hörmətli tapıcı, mənim adım Koana Baken. Mənim səkkiz yarım yaşım var. Mən yüzlərlə kolleksiya toplayıram və oyuncaq ayıları sevirəm. Mənim Duqal adlı itim var. Onun ad günü martın 29-dur və 15 yaşı olacaq! Bizim olduqca böyük bir evimiz var və mənim ən yaxşı dostum var. Mən dəftərxana ləvazimatları yığmağı xoşlayıram, amma anam buna nifrət edir. Məktəb layihəmiz poçt haqqındadır. Gələn il o, “Şarlottanın pautini”  romanı əsasında hazırlanacaq. Bu, kitabdır. Mən həm də şirniyyatları sevirəm. Yeri gəlmişkən, oğlanlara nifrət edirəm”, - 8 yaşlı qız məktubunda qeyd edib. 

Bu müddət ərzində mesaj 1200 kilometr yol qət edib. O, Norveçin yaşayış olmayan Qosver adasında sahilə çıxıb və onu Helena Andreassen Haqa tapıb. Qadın "Facebook"da Bakenin izinə düşüb və onu tapıb.

İndi 34 yaşında olan göndərici hazırda Avstraliyada yaşayır.

“Əvvəlcə butulkada mesaj göndərdiyimi xatırlamırdım, amma sonra məktəbdə etdiyimiz layihəni yuxu kimi xatırladım. Amma məktubu görən kimi dərhal öz yazımı tanıdım, indiki qədər səliqəli deyildi. Oxuyanda az qala gülməkdən ölürdüm, xüsusən də oğlanlara nifrətlə bitən son...”- qız deyib.

Mürtəza
Ölkə.Az