Taksi üçün istifadə olunan avtomobillərə görə daha yüksək sığorta haqqı ödənilə bilər
"Motor həcmi aşağı olan avtomobillər daha çox taksi fəaliyyəti üçün istifadə olunur. Xarici təcrübədə taksi xidmətində istifadə olunan avtomobillər üzrə sığorta haqqı fərqli qaydada ödənilir. Yəni, taksi fəaliyyətinə görə əlavə risk faktoru olur, bu da sığorta haqqını artırır".
Ölkə.Az xəbər verir ki, bunu, Azərbaycan Mərkəzi Bankının Baş direktoru Ziya Əliyev Report-a müsahbəsində bildirib.
Ziya Əliyev, "Bizdə də müvafiq dövlət qurumları bu sahədə müəyyən tədbirlər həyata keçirir" deyərək sözlərinə belə davam edib:
"Düşünürük ki, taksilərin xüsusi bir reyestri olsa və həmin reyestri təmin edən informasiya bazası İcbari Sığorta Bürosuna inteqrasiya edilsə, bu bizə taksi xidmətinə görə də əlavə risk əmsalı müəyyən etməyə kömək edəcək. Nəticədə taksi xidmətinə görə daha çox sığorta haqqı olacaq. Bu gün taksi xidmətində istifadə olunan avtomobil markalarının zərərliliyi 200-300 % səviyyəsində ola bilir".
